— 233 —
kalakoean jang demikian padamoe, dan apa kaoe tida kliroe artiken lagi ?”
„Mana bisa kliroe!” kata Touw Hin, jang lantas tjeritaken, bagimana tadi waktoe ia anterken benang soetra dengen perkatahan itoe njonja soeda njataken terang, jang satiap hari kaloe soeaminja pergi ka kantoor, ia disoeroe dateng boeat temeni minoem arak.―Tapi orang moesti mengarti apa artinja jang betoel itoe perkatahan „minoem arak”.
„Hm !......... hm !......... kaloe begitoe ?......” kata Jo Liem sembari toendoek, dan kamoedian memandang Touw Hin sambil berkata:
„Kaoe toeh tida soeka toeroet kahendaknja itoe njonja doerdjana, boekan ?”
„Tentoe !”
„Ja, itoelah memang adatnja orang-orang gaga; jang boekan sadja tida soeka berdjalan serong, hanja boeat plesir pada prampoean, sedikit poen tida mempoenjai hati. Itoelah haroes dipoedji.”
„Tapi itoelah boekan djawaban jang akoe ingin, Joheng ?”
Jo Liem tjoba berpikir. Sedeng Touw Hin berkata poela:
„Akoe maoe tanja kaoe poenja pikiran, bagimana akoe moesti berlakoe. Sebab kaloe sateroesnja Giok-go bawa ia poenja kalakoean jang begitoe tida taoe maloe, akoe koeatir.......ja, akoe koeatir,.......satoe waktoe kaloe akoe tida tahan sabar boleh terbit perkara jang tida enak?”
