— 168 —
pada sasoeatoe orang jang masoek dan kaloear, dengen teliti.
Pintoe-pintoe baroe di-idjinken boeka kombali pada sasoedanja terang tana, dan ditoetoep pada matahari moelai silam ka Barat. Malem dilakoeken pendjagahan terlebi keras, sebab koeatir nanti ada kawanan begal jang menjaroe dan masoek ka dalem kota.
Houw Seng sendiri mamereksa dengen radjin.
Jo Thaijsioe jang liat pengatoerannja Houw Seng begitoe roepa, djadi amat girang dan poedji dalem hati, bahoewa itoe pembantoe baroe betoel ada saorang gaga jang pande.
Lantaran taoe jang pendjagahan kota ada sampoerna dan prikeamanan tida nanti terganggoe ini pembesar jang goblog tida begitoe openi lagi pada sagala oeroesan-oeroesan, hanja satiap hari tinggal bersenang-senang di dalem roema, dengen tida merasa koeatir soeatoe apa.
Itoe waktoe Houw Seng di dalem tangsi tjoema tinggal bersama doeapoeloe soldadoe jang mendjadi pelajannja, kerna jang laen semoea dititahken mendjaga di sana sini. Pada itoe doeapoeloe orang ini pembantoe berlakoe manis. Dan itoe hari sasoedanja mengatoer beres kawadjibannja, ia laloe kaloearken sadjoembla oewang dan prenta sala satoe antaranja pergi beli daging dan arak, dan baboeahan boeat minoem.
Soldadoe itoe ada merasa katarik hati betoel. Apapoela waktoe itoe arak dan barang santapan
