— 167 —
„Kaoe ini jang bernama Houw Seng?” tanja itoe pembesar kamoedian.
„Bener, Thaijsioeija,” djawab Houw Seng sambil mendjoera.
„Dalem ini soerat Loan Thongtjie telah poedjiken padamoe,” kata itoe Thaijsioe: „jang katanja, salaen gaga, kaoe ada djadi moeridnja jang teroetama, hingga ia pertjaja dengen bantoeanmoe, kaoe bisa bantoe lindoengken ini kota sabagimana haroesnja.”
Kamoedian ia oetjapken bebrapa perkatahan enak dan perdjandjian bagoes boeat Houw Seng, kaloe sadja ini orang gaga bisa berhati-hati sampe prikeamanan dalem kota Tengtjioe tida terganggoe.
Houw Seng bongkoki badan dan hatoerken trima kasi boeat itoe semoea perdjandjian jang Jo Giam briken.
Kamoedian itoe waktoe djoega ia berlaloe dari kantoor terseboet boeat djalanken kawadjibanja.
Jo Giam merasa girang bisa dapet satoe pembantoe, tapi Houw Seng poenja girang terlebi besar lagi. Kerna sekarang, sagala maksoednja, njata ampir berhasil. Boekan sadja itoe goeroe Loan Teng-giok, malah ini pembesar poen tida sekali ada bertjoeriga.
Sasampenja di lapangan Houw Seng laloe itoeng kombali itoe soldadoe jang ada di bawah prentanja, kamoedian bagi-bagi ka ampat pendjoeroe pinto kota boeat mendjaga dan preksa
