— 41 —
keliatan djadi mera djamboe, jang menoeroet pengrasaan; Thian Hok roepanja itoe prempoean djadi semingkin boto, ketambahan lagi sedi, semingkin-mingkin Thian Hok djadi kesian. Kaloe bisa dan tiada takoet, Thian Hok maoe toeloengin pada itoe prempoean, seperti djoega di itoe malem ia toeloengin koetika ia dapet mabok laoet.
Itoe prempoean toea koetika dapet liat pada Thian Hok laloe samperin padanja dan kaloearken perkataan: „Nie Sé Semo Ming Sé", hal mana membikin Thian Hok djadi ketakoetan dikira itoe prempoean toea maoe poekoel padanja atawa maoe tanjaken halnja jang semalem. Tetapi Nio Sam jang taoe apa maoenja itoe batauw, laloe kasi taoe pada Thian Hok, bahoea boekan ia tanjaken pri hal semalem atawa maoe maraken padanja, hanja menoeroet kabiasaan adatnja, menanja pada satoe orang jang baroe dikenal, jang tiada saorang dalem itoe kapal dapet taoe artinja, baroelah hatinja Thian Hok djadi senangan, maka ia manggoetken kepalanja pada itoe batauw, jang dibales olehnja.
Sasoejanja Nio Sam bitjara-bitjara sedikit pada itoe batauw, baroelah ketaoean itoe prempoean ada bernama Yap Koei Hoa. Sabetoelnja ia ada anaknja saorang baek-baek, kerna dapet pendidikan sala dari iboe tirinja, maka soeda kadjeblos
