— 4 —
Liem Si An lantaran ada satoe soedagar jang manis boedi bahasa dan pinter, maka tiada heran blon berapa lama ia berniaga di itoe tempat, soeda beroentoeng bisa diriken poela satoe toko di Negri Siam.
Kaloe Liem Si An pergi ka Siam boeat oeroes perniagaannja, dalem oeroesan toko di Siongkouw-tin ia seraken pada iboenja jang dipanggil Tan Si berdoea istrinja bernama Lie Si terbantoe dengan bebrapa koeli. Ini iboe dan istri ada tinggal di Bwe-koan.
Toko Liem Si An di negri Siam djoega ada sanget madjoe, lantaran mana ia tiada boleh tinggalken sablonnja dapet orang kapertjajaan. Itoe sebab dengen idzin iboe dan istrinja, ia telah menika poela pada satoe gadis Siam boeat rawat padanja di sana bernama Hek-kat.
Koetika Liem Si An beroesia ampat poeloe taon, Lie Si, istrinja telah melahirken satoe anak lelaki dengen slamet, dan boeat ini hal laloe dikasi kabar dengen telegram pada Liem Si An jang djoestroe di itoe koetika berada di negri Siam.
Begimana girang hatinja Liem Si An, itoelah kita tiada bisa toetoerken dengen kalam, kerna dengen sorot moeka berseri, ia bales itoe kawat pada iboenja dengen rasa beroentoeng, tapi kasi taoe lantaran oeroesan dagang di Siam ada sanget repot, maka ia blon bisa poelang boeat te-
