— 36 —
Thian Hok sekarang ada sendirian didalem kamar. Ia pikirin tiada bisa soeda halnja itoe prempoean Satelah djem mengoendjoek soeda djaoe malem, baroelah Thian Hok baringken dirinja dan tidoer poeles.
Besoknja pagi Thian Hok soeda mendoesin, boeroe-boeroe tjoetji moeka, dimana ia dapetken laen-laen penoempang sedeng berkoempoel saling tjeritaken halnja semalem ombak begitoe besar hingga kapal djadi bergontjang keras membikin banjak orang dapet mabok laoet.
Ini orang-orang koetika liat pada Thian Hok, sala satoe antaranja telah menoendjoek pada dirinja itoe orang moeda dan berkata:
„Paling moedjoer sekali Liem Thian Hok. Orang laen sedeng moenta oeger mabok laoet, adalah ia rasaken sedepnja kembang jang menjasar dalem kamarnja.“
„Ja, akoe denger semalem ia bangoen ambil aer thee,“ berkata laen penoempang sambil tertawa. „Sekarang itoe prempoean soeda tiada ada, brangkali malem-malem djoega ia soeda anterin poelang. Soenggoe pinter sekali itoe anak.“
Liem Thian Hok denger begitoe djadi kemaloean, tiada dirasa lagi dadanja telah berombak kerna itoe waktoe amaranja telah dateng, maka satelah abis tjoetji moeka laloe ia samperin itoe orang jang tadi omongin padanja dan berkata
