— 23 —
lannja itoe praoe ada tjepet sekali, dan tiada brapa lama soeda sampe diwaktoe malem plaboean Soa-tów.
Sebagimana biasa di itoe plaboean banjak koeli pada berkoempoel aken angkoet barang-barang dari penoempang praoe jang baroe sampe, maka boeat orang-orang jang sampe disitoe tiada terlaloe ripoe boeat tjari koeli lagi maski ditenga malem boeta.
Seperti djoega laen-laen penoempang, Nio Sam poen berdoea Thian Hok naek ka darat sasoedanja dapet bebrapa orang koeli boeat angkat barang-barangnja.
Di Soa-tow tiada koerang roema menginep dengen bajaran moera dan ada disediaken djoega makanan. Antara begitoe banjak hotel Nio Sam pili hotel Tin An. Ampir bisa dipastiken saben kali Nio Sam sampe disitoe ia menginep di ini hotel, kaloe masi ada sedia kamar kosong, kerna Nio Sam ada kenal baek pada eigenaar hotel jang ada berasal dari Bwe-koan djoega.
Kedatengannja Nio Sam dan Thian Hok telah disamboet oleh ini eigenaar dengen manis boedi, sebagimana biasa ia berlakoe pada laen-laen penoempang, maka orang banjak lebi soeka menoempang menginep disitoe, sebab selaennja pengoeroes hotel ada berlakoe manis, poen pembajarannja tiada begitoe mahal.
