— 206 —
Thian Hok njataken dalem itoe soerat, Koei Hoa boleh ikoet orang lagi pada lelaki jang ia soeka.
Begimana kasoedahannja dengen Koei Hoa, inilah tiada ditoetoerken, tjoema orang dapetken blakangan Koei Hoa loentang lantoeng ditenga pasar dari Singapore dengen moeloetnja ngotje kalang kaboet seperti orang gila. Orang banjak jang liat kelakoeannja Koei Hoa telah merasa kesian pada peroentoengannja ini nona moeda jang doeloe begitoe bagoes dan diboeat reboetan oleh orang-orang hartawan, sekarang telah dapet nasib begitoe djelek.
Blakangan orang dapetken Koei Hoa dengen moeka jang tiada karoean matjem, badjoe petja, kaen boeroek telah bersender ditenga djalan sembari minta-minta. Tetapi orang takoet deketin pada Koei Hoa lantaran sekarang Koei Hoa soeda djadi gila betoel. Kaloe orang kasi doeit atawa makanan ia boeang ini dengen berkata:
„Akoe tiada soedi toeloengin orang, kerna akoe merasa penasaran pada Thian Hok, jang akoe soeda ikoetin begitoe sengsara, berbalik ia goeling padakoe. Thian Hok sekarang senang-senang pada istri kawinnja.”
Tempo-tempo orang liat Koei Hoa tertawa sendirian. Djoega tiada djarang Koei Hoa menangis sedi dengen seboet-seboet namanja Liem Thian Hok.
