— 204 —
tiada ketjil hati kerna akoe soeda berboeat lantjang.
Sekarang akoe dapet taoe ia tinggal di hotel Ting-nan mendjalanken pakerdjaan hina lagi.
Laen tiada. Akoe harep engko sekalian familie tiada koerang soeatoe apa.
Tertinggal akoe poenja hormat.
SOUW HAP HOEN.
Liem Sie An satelah batja abis ini soerat, laloe adepin Thian Hok dengan berkata:
„Thian Hok, kaloe Koei Hoa soeda berboeat jang tiada kepantesan boeat apa kau pikirin. Memang soeda loemrahnja prempoean hina, biar begimana kita sajang dan tjinta, kaloe kita meleng sedikit, tentoe ia berdjalan serong. Kau moesti inget pada poehoen karet, biar ia ditanem didalem pot, toch akarnja kaloeat dari atas. Begitoe djoega dengen prempoean hina, biar kita kasi makan pake sampe tjoekoep, toch ia tiada merasa poeas. Lagi poen kaloe kau piara padanja teroes, soeda tentoe membikin djelek kau poenja toeroenan. Tjoba kau inget, dikamoedian hari kau bisa dapet anak, soeda tentoe ini anak tiada ada jang soedi boeat mantoe kaloe prempoean, sedeng kaloe lelaki soeda tentoe soesa ditjariken pasangannja, sebab sa-
