— 196 —
boean mengoeroes kiriman, Tiong Djin lantes ikoetin dari blakang, kamoedian satelah Tiong Djin liat Kim Sioe biloek ka roemanja Hek-kat, boeroe-boeroe Tiong Djin poelang kasi taoe pada Thian Pouw. Dan dengen berdoea marika pergi mengintip dengen ambil djalan dari kebon. Koetika ia sampe di ini pekarangan, mendadak satoe binatang andjing melompat lari dari goendoekan kajoe, hingga marika djadi kaget sekali, tetapi marika tiada ambil perdoeli, marika berdjalan teroes sampe dibagian bawa djendela deket divan jang Hek-kat doedoek, hingga ia djadi denger njata apa jang ini doea menoesia sedeng moefaketin.
Sedeng pada Hek-kat kedjadian begitoe, adalah pada Koei Hoa tiada kala pentingnja aken pembatja taoe.
Sedari Thian Hok poelang ka Tiongkok mengoeroes dikoeboernja iapoenja ma toea, Hap Hoen jang memang boekan ada menoesia baek, telah taro tjinta pada Koei Hoa.
Soeda lama memang Hap Hoen ada maoein pada Koei Hoa, tetapi sebegitoe lama ini niat blon bisa disampeken, lantaran koetika masi djadi Loenga raja dari Sian Siam Tjaij ada terlaloe „sikia”, ketambahan banjak hartawan pada gilain, maka Koei Hoa tiada ladenin pada Hap Hoen maski maoe dikasi wang berapa banjak djoega.
