— 146 —
Tan Sam denger bitjaranja Tjit Mah telah djadi mesem, kerna roepanja ia bisa sekali mengoempak orang. Seabisnja ngomong laen-laen hal, dan satelah kasi taoe jang Tjit Mah boleh lantes kasi taoe pada politie perkaranja, kamoedian Tan Sam berlaloe dengen tinggalken Tjit Mah oewang sapoeloe dollar boeat berobat.
Tjit Mah maski badannja pada sakit, tiada oeroeng ia anterken djoega Tan Sam sampe diloear, kamoedian ia masoek lagi dengen pikiran senang soeda dapet advies baek dan toendjangan tjoekoep dari Tan Sam. Tetapi ia tiada taoe, Tan Sam dan ia semoeanja ada berpikiran kerbo. Tjobalah pembatja liat apa kamoedian Tjit Mah nanti dapetken asilnja dari itoe pengadoean.
Besoknja Tjit Mah pergi ka pengadilan aken adoeken perkaranja, jang satelah hakim denger pengakoeannja Tjit Mah, kamoedian ia prenta panggil Koei Hoa berdoea Thian Hok diroemanja Pouw Teng.
Tiada lama Koei Hoa berdoea Thian Hok dateng, dimana marika disilaken doedoek dan didenger ketrangannja. Moela-moela hakim tanja pada Koei Hoa:
— „Apa betoel kau soeda dibeli oleh Tjit Mah?”
— „Betoel,” kata Koei Hoa, „tempo ia beli masi roemadja poetri di Tiongkok.”
