— 110 —
ketemoeken temennja Thian Hok bernama Siauw Hok Keng jang sering djalan bersama-sama ia.
Dari ini orang Koei Hoa dapet ketrangan lengkap tentang Thian Hok, dimana sepandjang dengerin tjerita, hatinja Koei Hoa seperti djoega diiris-iris dan dengen tiada dirasa lagi aer matanja melele.
„Ja, engko Thian Hok! Kasian sekali, orang soeda bikin kau tjilaka, beroentoeng ada Liem Pouw Teng jang toeloeng, kaloe tida, blon taoe kau begimana djadinja!“ kata Koei Hoa.
Koei Hoa rasaken badannja lemas dengen mendadak dan napasnja sesak, kaloe tiada keboeroe dipegang, tentoe ia soeda tergoeling ditana dengen klenger. Sasoeda sedikit lama baroelah ia bisa bitjara lagi dan menanja:
„Apatah kau tiada djoesta, engko Hok Keng?“
„Tida, Koei Hoa,“ kata Hok Keng, „akoe tida djoesta. Kaloe kau tiada pertjaja tjoba kau pergi karoemanja Liem Pouw Teng jang pernanja dioedjoeng gang, dalem satoe roema ketjil.“
Sasoedanja mengoetjap banjak trima kasi, Koei Hoa prenta toekang kandaran biloekin djoeroesan kamana Hok Keng oendjoek. Betoel disitoe Koei Hoa liat ada berdiri satoe roema goeboek dengen sedikit pekarangan lebar. Koei Hoa laloe toeroen dan masoek ka dalem, dimana djoestroe Pouw
