— 11 —
boekan seperti Thio Kan dan Columbus, tetapi akoe maoe tjoba peroentoengan di laen negri, tiada perdoeli itoe perdjalanan moesti melintasin laoet atawa daratan jang soeker, kerna peroentoengan ada ditangan Allah.
„Tjoba liat pada Tjie Ah Taij dan Nio Koei Hin,” meneroesken Thian Hok dengen iapoenja tjerita, „akoe poenja doea temen sekola, doea-doea oesianja tiada terpaoet djaoe dari akoe, baroe ini soeda pergi ka kota besar boeat bekerdja, sekarang akoe denger ia berdoea soeda makan gadji besar dari satoe peroesahan. Kenapa akoe djoega tiada maoe tjoba begitoe?”
Tan Sie jang dari setadi dengerken ini tjoetjoe tjerita; telah djadi mesem simpoel, diam-diam ia memoedji pada Thian Hok, jang tentoe dikamoedian hari aken djadi satoe anak jang beroentoeng. Tetapi soepaja Thian Hok tiada bitjara banjak boeat agoelken djasanja itoe orang-orang doeioe, dimana katanja ia poen aken toeroet sebagi marika, satoe omongan jang menandaken begimana Thian Hok poenja soeka mengobrol, maka dengen soeara sedikit keras ia berkata:
„Thio Kan dan Columbus, itoe semoea akoe tiada taoe. Satoe anak jang baek tiada tjoema perhatiken perboeatan orang doeloe jang kesohor, hanja lakoeken dan oendjoek boektinja setjara laki-laki, inilah jang paling teroetama.
