— 10 —
kirim kau ka sana, begimana kau poenja pikiran?”
Thian Hok batja itoe soerat dengen teliti, keliatannja ia batja dan batja lagi, seperti lakoenja satoe orang jang dapet batja kabar jang sanget penting. Satelah abis, dengen moeka girang ia berkata:
„Boeat pergi ka Siam beladjar dagang, bersama-sama ajah memang djoega akoe kapengen. Soeda lama akoe kasi taoe pada iboe jang akoe maoe pergi ka sana, tetapi iboe kata, akoe masi terlaloe moeda boeat bisa tahan mabok laoet dikapal, kerna Siam boekan perdjalanan jang deket, ketambahan tiada ada orang jang anter akoe ka sana. Sekarang kabetoelan sekali ajah sendiri soeroe akoe brangkat, inilah ada satoe kabar girang bagi akoe.
Dalem sekola sering-sering goeroekoe bilang, Thio Kan panglima Han Tiauw lantaran mempoenjai kepandean soeda bisa reboet negri sebla Barat jaitoe See-yoe, hingga keizer Han Boe Tee koerniaken ia pangkat Pok Hong Bouw. Columbus lantaran kakerasan hati terbantoe dengen kepinterannja soeda menjebrang laoetan mentjari negri baroe. Denger banjak soesa achirnja ia soeda beroentoeng dapetken djoega, jang sekarang diseboet Amerika, kamoedian orang djeman blakangan bikinken patoeng jang meroepaken dirinja dari koeningan sebagi tanda peringetan. Maski akoe
