37
sabentaran dari dia orang soepaja dia ada sempat boeat boeka itoe lemari besi sendirian.
Maka katanja pada misanan misanannja kau semora tentoe lapar boekan? akoe lantas soeroeh taro makan.
O trima kasi, trima kasi berkatalah itoe orang orang, kita soedah makan di djalan.
Rabiot terlebih mendongkol, dia marah kenapa dia tida bisa dapet sempat boeat tinggal sendirian di itoe kantornja Joramie dengan lemari besinja.
Malahan itoe orang orang adjak sama Rabiot boeat pegi liat kamar kamarnja Joramie aken bisa dapet taoe dia poenja barang barang jang di tinggalin.
Maoe tida maoe, Rabiot kepaksa misti anterin kasi liat semoea kamar kamar.
Ach kaloe liat ini ampat orang berdjalan memeriksa barang barang dalem kamar, sama djoega boeroeng gagak jang di dekat dekat dengdeng. Bertjektjokan seperti maoe mereboet barang barang jang belon tentoe dia orang poenja. Njata sekali dia orang dateng boekan boeat endahin orang jang mati tetapi boeat liat poesakanja sadja.
Memang begitoe di doenia cewang jang di gede-in orang jang meninggalken poesaka tida di endahin; atau di endahin di moeloet sadja boekan di dalem ati, melainken oewangnja djoega jang di besarin.
