119
Pengrasaan itoe begitoe moelia sampe dia sekali kali tida ada niat boeat tjaboet toemboehan katjintaan itoe jang ada di dalem atinja. Apa poela dia liat teman temannja teramat beroentoeng berlaki istri, dia liat bagimana George Ramel poenja beroentoeng dengan istrinja, djadi pengrasaan atinja Lucien terlebi tetap lagi.
Ini poen mendjadiken sebab kenapa Lucien tida maoe minta toeloengan orang laen. Dia tjintain Eugenie, dialah sendiri haroes toeloeng padanja dan pada mamanja.
Lucien Morel memang lagi loekis satoe gambar teramat bagoesnja ia itoe gambarnja doea anak anak ketjil jang lagi maen dengan satoe koetjing selagi mamanja itoe anak anak lagi menjoelam.
George Ramel poedji soenggoe kerdjaannja Lucien.
Di hari Minggoe Lucien kerdjain bikin abis loekisannja
Besokan pagi sabelonnja tempat orang bekerdja di boeka dia lekas boengkoes baik baik gambarnja dia kempit itoe di tangannja laloe keloear diam diam tida keliatan orang.
Dia pegi ketokonja toean Petit jang biasa beli gambar gambar. Inilah pertama kali jang Lucien maoe djoeal maoe dapet oewang dari kerdjaannja.
