— 78 —
ia djadi sakit, sebagi orang jang saben hari dahar barang makanan jang tiada kroean tentoe nanti djadi dapet sala satoe penjakit. Porthos djoega toeroet senang, ia pikir, sekarang ia ampir djadi satoe baron, perloe ia tilik begimana Athos dan Aramis jang memang ada toeroenan bangsawan sedjati, biasa berlakoe. Aramis ingin dapet taoe dari d'Artagnan dan Porthos kabarken dari keada'annja di Palais Royal.
Tjoema Athos sendiri sadja jang tiada ada perloe satoe apa, ia telah berboeat begitoe tjoema lantaran ingin persobatan antara ini ampat orang djadi kekel lagi sebagimana doeloe.
Iaorang berdjandji boeat kasi taoe satoe sama laen poenja tempat tinggal dan apabila sala satoe ingin iaorang berkoempoel, itoe perminta'an moesti lantes ditrima, sedeng jang minta itoe perkara, boleh wartaken keinginannja di papan jang ada di depan roema makan. „Hermitage.“
Koempoelan jang bermoela dibikin jaitoe pada hari Rebo jang dateng, pada djem poekoel delapan malem.
Pada waktoe jang soeda ditentoeken itoe ampat sobat dateng bebareng, tapi masing masing dari laen djalanan. Porthos abis preksa satoe koeda jang ia niat maoe beli, d'Artagnan baroe poelang dari djaga'an di astana, Aramis baroe tengok satoe sobatnja jang sakit. Athos jang tinggal deket itoe tempat dateng dari djoeroesan Pont Neuf, Porthos dari dialanan Roule straat, d'Artagnan dari djalanan Fossee Saint, Germain dan Aramis dari djalanan Bethisy straat, iaorang djadi bengong koetika dapat liat kawannja dateng bebareng, tapi masing masing dari laen djoeroesan.
