— 65 —
orang djadi doega sala ? Apa itoe angkatan prang moesoe sama sekali ada di sana ?
Atas ini pertanja'an graaf de Guiche tiada bisa kasi djawaban, tapi djoestroe itoe perkara toean prins anggep penting dan perloe ia dapet taoe.
Raoul jang lebi doeloe ada rasa sedikit maloe di hadepannja toean prins lantes madjoe satindak dan kata:
„Apa monseigneur soeka kasi akoe idzin boeat oendjoek satoe djalan dari mana brangkali bisa didapetken ketrangan ?“
Toean prins menengok dan awasin sakedjep; ia tersenjoem koetika ia liat satoe anak moeda jang baroe limablas taon oemoernja.
„Tentoe, tentoe, toean boleh bitjara,“ kata toean prins jang bikin swaranja jang njaring djadi sedikit plahan sebagi ia lagi bitjara pada satoe prempoean.
„Monseigneur boleh tjoba minta ketrangan dari orang Spanjol jang kena ditawan,“ kata Raoul sedeng moekanja keliatan djadi sedikit mera.
„Kau soeda tawan satoe orang Spanjol? treak toean prins.
„Ja. Monseigneur,“ kata Raoul.
„O! betoel, kata de Guiche, akoe soeda loepa padanja.“
„Soeda tentoe djadi begitoe, toean,“ kata Raoul dengen tersenjoem „kerna kau jang soeda tangkep padanja.“
Maarschalk de Grammont menengok pada Raoul dan rasa senang hatinja Raoul soeda poedji poetranja.
Toean prins kata:
„Apa jang ini anak moeda bilang ada betoel, panggil itoe orang jang ditawan.
