— 314 —
Dengen plahan ia hampirken itoe kreta preksa tjap tanda kabesaran jang ada digoeba di pintoe kreta dan pakean koesirnja. Ini perkara ia djadi lebi gampang berboeat, kerna itoe tatkala koesirnja lagi tidoer poeles.
Ini ada kretanja toean coadjutor, ha akoe moelai pertjaja Jang Maha Kwasa soeka bantoe kita poenja oeroesan."
Dengen plahan ia masoek naek dalem kreta, tarik satoe pita soetra jang ada di'iket ka djeri-djinja koesir dan berkata :
„Ka astana Palais Royal!"
Lantaran baroe sedar itoe koesir kira jang ia poenja toean soeda kasi itoe prenta. Pengawal pintoe hek astana baroe maoe toetoep pintoe hek, tapi koetika ia liat itoe kandaran bagoes dateng, ia kira saorang jang deradjatnja besar dateng boeat sala satoe perkara perloe, maka ia kasi masoek dan ini kreta dibrentiken di depan pintoe besar dari astana.
Sesampenja di sana koesir baroe dapet taoe jang ia poenja doea looper tiada toeroet di blakang dan kerna ia kira betoel dalem itoe kreta ada ia poenja toean, maka ia lompat dari bok dan boeka pintos kreta, sedeng les ia tiada lepas dari tangannja.
D'Artagnan itoe koetika baroe maoe kaloear dari kreta dan sedeng koesir djadi kaget liat ada laen orang kaloear dari kretanja, d'Artagnan lantes tjekek itoe koesir dan toedjoeken satoe pistol di moekanja.
„Djangan tjoba boeat boeka soeara djikaloe kau sajang kau poenja djiwa !" kata d'Artagnan.
Koesir mengarti ia soeda kena ditipoe, tapi tiada brani melawan, maka ia tinggal berdiri bengong dan matanja mendelik.
