— 289 —
Kau ada bekerdja di bawa prentanja Kardinaal, tapi kau moesti toeloeng akoe djoega dan akoe nenti oeroes boeat kau di blakang hari. Bilang pada akoe, apa kau nanti berboeat lagi sebagimana itoe orang bengsawan jang kau tiada kenal, telah berboeat boeat Ratoenja ?“
„Akoe nanti berboeat sekalian perkara jang Sri Baginda soeka prenta pada akoe,“ kata d'Artagnan.
Ratoe Anna diam bebrapa lamanja boeat berpikir dan lantaran ia liat jang d’Artagnan berlakoe sebagi ia tiada taoe satoe apa, Sri Baginda tanja:
„Kau brangkali soeka ambil senang boeat kau poenja diri?“
„Atas itoe pertanja’an akoe tiada bisa kasi djawaban jang pantes, njonja, kerna akoe blon taoe begimana rasanja senangken diri.“
— „Apa kau ada poenja sobat?“
— „Doeloe akoe ada tiga sobat, doea soeda pergi dari Parijs, akoe tiada dapet taoe di mana iaorang soeda pergi. Tinggal satoe sobat sadja, tapi ia ada satoe dari itoe orang orang, jang Sri Baginda telah bilang baroesan, ada kenal pada itoe orang bangsawan.“
— „Baek, kau dan kau poenja sobat ada lebi berbarga dari satoe balatentara.“
— „Apa akoe moesti bikin, njonja.“
— „Pada djem poekoel lima sore kau moesti balik dan akoe nanti kasi taoe apa kau moesti berboeat; tapi djangan bitjara pada satoe menoesia apa jang kita soeda bitjaraken, toean“
— „Akoe tiada nanti bitjara pada laen orang, njonja.“
— „Soempa di hadepan ini gambar Christus.“
— „Akoe blon taoe berdjandji sala, njonja,
