— 283 —
Djikaloe akoe tiada sala liat, ada satoe koempoelan orang dengen berpake pakean prang dan lengkep sendjatanja tiada brentinja awasin ini djendela dan djikaloe kau angkat gordijnnja, iaorang nanti dapet liat kau. Mari toeroet ka ini djendela dan kau liat apa di bawa? Kau liat itoe koempoelan rahajat negri bersendjata djaga kau poenja pintoe. Semoea pintoe astana di djaga, hingga akoe djadi kepaksa oelangken perkata’annja La Ramee, koetika ia kasi rapport tentang djaga’an toean de Reaufort: „Djikaloe kau tiada bisa beroba djadi boeroeng atawa djadi satoe tikoes, kau tiada bisa kaloear dari ini tempat.“
— „Tapi de Beaufort toch bisa lari!“
— „Apa kau ada niatan boeat berboeat djoega sebagi de Beaufort ?“
— „Djadi akoe ada sebagi orang ditahan ?“
„Parbleu !“ kata Mazarin, „soeda satoe djem lamanja akoe tjeritaken ini perkara pada kau.“
Kardinaal doedoek lagi di medja toelisnja dan maoe teroesken ia poenja soerat boeat Cromwell.
Dengen sanget goesar Ratoe Anna djalan dan banting pintoe gang diblakangnja.
Sesampenja di kamarnja Sri Ratoe rebaken dirinja di satoe korsi males dan menangis. Dengen kaget ia dapet satoe pikiran.
„Akoe ketoeloengan,“ kata Ratoe Anna dalem hatinja; „O, akoe kenal satoe orang jang bisa toeloeng bawa akoe kaloear dari Parijs, satoe orang jang soeda lama akeoe loepaken.“
Kamoedian dengen hati girang Ratoe Anna kata lagi dalem hatinja:
„O, akoe ada saorang koerang trima! Doea poeloe taon lamanja akoe loepaken itoe orang
