— 279 —
biasanja mata orang jang sanget girang hatinja,
„Kau kenapa, njonja?“ menanja Mazarin dengen kaget; „kau keliatannja sanget angkoe.“
„Ja, Guilio,“ kata Ratoe Anna, „angkoe dan beroentoeng, kerna akoe dapet satoe djalan boeat bikin moesna itoe kawanan pendjahat.“
„Betoel kau saorang jang pande oeroes pamerentahan negri, Ratoekoe,“ kata Mazarin; „tjoba kasi denger.“
Dengen tjepet Mazarin semboeniken sooratnja dengen taro sapotong kertas laen di atasnja ia poenja soerat.
„Iaorang maoe rampas Radja dari akoe poenia tangan, kau soeda taoe boekan?“ kata Ratoe.
—„Betoel dan iaorang maoe gantoeng akoe.“
—„Iaorang tiada nanti dapet Radja.“
—„Dan tiada nanti bisa gantoeng akoe djoega.“
—„Denger: akoe maoe soepaja Radja, akoe dan kau terlepas dari jaorang poenja tangan. Ini perkara nanti roba sama sekali keada’an di sini, tapi ini perkara tiada boleh laen orang dapet taoe, melaenken kau, akoe dan satoe orang lagi.“
—„Siapa jang satoenja?“
—„Betoel ia soeda dateng, sebagimana orang kabarken pada akoe?“
—„Ja, semalem.“
—„Kau soeda bitjara padanja ?“
—„Baroesan ia baroe pergi.“
—„Apa ia maoe toeloeng djalanken ini perkara?“
—„Ia jang soeda kasi pikiran.“
—„Abis Parijs?"
