— 188 —
soeda djalan dari Tol des Sergents sampe di lapangan deket gredja Notre Dame, tapi koetika ini barisan tiada djalan lebi djaoe dan satoe bagian dipisa boeat djaga di bebrapa djalanan laen, antara mana ada satoe djalanan di depan roemanja toean Broussel, Friquet lantes inget, itoe pagi ia blon dahar satoe apa, Sasoedanja berpikir bebrapa lamanja, ia pikir, baek dateng minta makan pada toean Broussel, tapi djangan sampe itoe toean dapet taoe, ia sengadja dateng boeat ini perkara.
Dengen djalan separo lari, hingga ia sampe di depan roemanja itoe raadsheer dengen napas tersengal sengal, ia ketok pintoenja.
Friquet poenja iboe satoe boedjang lama dari toean Broussel, boekaken pintoe.
„Apa kau bikin di sini, binatang?“ menanja iboenja, „kenapa kau tiada ada di Notre Dame?"
„Akoe soeda pergi di sana, iboe,“ menjaoet Friquet; „tapi di sana akoe dapet liat bebrapa perkara jang toean Broussel haroes dapet taoe; dan dengen idzinnja toean Bazin, iboe, kau taoe, toean Bazin ada pengoeroes Notre Dame, akoe dateng di sini boeat ketemoe pada toean Broussel.
― „Apa kau maoe kabarken pada toean Broussel, anak nakal?“
― „Akoe maoe bitjara padanja.“
― „Tiada bisa, ia lagi bekerdja.“
„Akoe nanti toenggoe sampe ia soeda sempet,“ kata Friquet, tapi ia lantes lompat di tangga dan naek teroes ka dalem roema, sedeng iboenja ketinggalan di loear.
„Apa toch jang kau maoe kasi taoe pada toean Broussel?“ bertreak iboenja.
