— 182 —
bertreak, „sekarang akoe soeda kenalken.”
Ia poenia treakan dan ketawa djadi lebi njaring kadengerannja lantaran ketiop angin ka djoeroesan itoe praoe.
Aramis djadi gemeter.
„Sabar,“ kata Athos, „kenapa begitoe, apa kita boekan laki laki lagi?”
„Tentoe!“ kata Aramis, „tapi itoe binatang di sana boekan menoesia, ia ada satoe setan. Tjoba kau tanja sadja pada oomnja, apa akoe berboeat sala, djikaloe akoe tembak ia poenja neef.”
De Winter tiada djawab satoe apa, tapi ia mengela napas.
„Dengen berboeat begitoe semoea perkara djadi beres,“ kata poela Aramis. „O, Athos, akoe kwatir, kau poenja hati sabar soeda bikin akoe berboeat satoe perkara sala besar.“
Athos pegang tangannja de Winter dan boeat bikin, soepaja iaorang bitjaraken laen perkara, ia tanja:
„Kapan kita bisa sampe di negri Inggris?“
Tapi itoe orang bangsawan Inggris tiada denger apa jang Athos tanja padanja, maka ia tiada menjaoet satoe apa.
„Athos,” kata Aramis, „brangkali masi ada tempo, tjoba liat ia masi ada di itoe tempat.“
Athos paksa boeat menengok ka itoe djoeroesan, sabenernja ia tiada soeka liat moekanja itoe anak moeda. Betoel itoe anak moeda masi ada berdiri dan sinar api dari lentera laoet terangken moekanja.
„Tapi apa ia bikin di Boulogne ?“ menanja Athos, jang lebi perloe dapet taoe, lantaran apa itoe anak moeda ada di sana.
„Ia intip akoe, ia intip akoe,“ kata de Winter
