— 175 —
apabila ia dapet denger diseboet namanja de Winter, tapi kerna moekanja tiada sekali beroba lantaran itoe perkata’an, ini doea sobat kira iaorang soeda sala doega dan brangkali tjoema kabetoelan sadja itoe orang moesti liwat di itoe tempat djoega.
„Toean toean,” kata itoe anak moeda dengen tiada sekali djenga roepanja serta dengen hormat „djangan goesar akoe soeda ambil kebranian menanja, kerna akoe sanget ingin taoe satoe perkara; apa tiada sala djikaloe akoe doega toean toean dateng dari Parijs atawa lebi baek djikaloe dibilang, kau orang boekan pendoedoek dari ini kota?“
„Betoel, kita dateng dari Parijs,“ kata Athos dengen manis boedi djoega, „Toean ada kaperloean apa ?“
„Apa toean soeka kasi akoe taoe, betoel apa tiada itoe kabar tentang Mazarin soeda tiada djadi minister lagi?“ itoe anak moeda menanja.
„Ini satoe pertanja’an ane,“ kata Aramis.
„Ia masi djadi minister, tapi sekalian ia tiada djadi minister djoega,“ kata Athos, „mengartinja: separo dari rahajat negri Frans tiada soeka padanja, tapi dengen tipoe boesoek dan dengen bikin banjak perdjandjian maoe toeloeng orang jang toendjang padanja, ia sekarang masi pegang itoe djabatan. Djadi dengen begitoe blon bisa dipastiken lebi doeloe, brapa lama ia masi bisa pegang itoe kekwasa’an.“
„Djadi boekan ia lari atawa ada ditahan dalem pendjara ?“ itoe anak moeda menanja lagi.
„Tiada, toean, sekarang blon,“ kata Athos.
„Banjak trima asi toean soeda kasi itoe ketrangan,“ mengoetjap itoe anak moeda jang lantes djalan lebi djaoe.
