— 165 —
satoe Radja jang ada dalem begitoe banjak soesa dan toeloeng satoe Ratoe jang moelia, kita djalanken prentanja Allah. Kita orang poenja hati dan djiwa ada dalem njonja poenja tangan."
„O, toean toean," kata Ratoe Henriette dengen swara girang sampe kaloear aer matanja, „baroe ini waktoe akoe djadi ada lagi harepan dan rasa girang seabisnja kita orang ada dalem soesa. Betoel, djalanken prentanja Allah dan di mana akoe tiada ada sampe kekwasa’an boeat bales boedi begitoe brat, ada Allah jang nanti bales kau orang poenja pakerdja’an dan Allah nanti dapet taoe djoega, begimana akoe tiada nanti loepaken ini boedi.
„Toeloeng akoe poenja soeami, toeloeng Radjadan maski kau tiadahargaken itoe perboeatan moelia, biar akoe boleh harep nanti ketemoe poela pada kau orang, soepaja akoe sendiri, bisa menjataken akoe poenja trima Kasi pada kau. Dengen menoenggoe kabar dari negri Ingeris akoe tinggal di sini sadja. Apa kau tiada perloe pesen apa apa? Akoe sekarang soeda djadi kau orang poenja sobat dan lantaran kau pergi oeroes akoe poenja pakerdja’an, akoe toch boleh djoega tjampoer dalem kau orang poenja oeroesan."
„Njonja," kata Athos, „akoe melaenken maoe minta, soepaja njonja bantoe doaken."
„Dan akoe," kata Aramis, „tjoema ada saorang diri di ini doenia, djadi tjoema perloe djalanken Sri Baginda poenja prenta sadja."
Permisoeri angsoerken tangannja jang ini doea orang bangsawan tjioem.
Pada de Winter Permisoeri kata dengen swara plahan:
