— 156 —
Koetika ia liat pintoe kamar soeda ditoetoep lagi dan ia denger itoe anak moeda dengen swara girang treaken Grimaud dan Olivain, Athos mengela napas.
„Dengen tjepet ia maoe pergi lagi,“ Athos pikir dalem hatinja, dengen gojang ia poenja kepala, „tapi ia menoeroet atoeran orang banjak. Memang sengadja soeda diatoer begitoe, sekalian menoesia toedjoeken moekanja kadepan.
Dengen itoe perkata’an Athos maoe bilang, biasanja orang pikirken sadja perkara jang blon kedjadian, perkara jang soeda liwat tiada begitoe diperdoeliken lagi. Soeda tiada bisa disangkal lagi, ia tjinta itoe nona di Blois; tapi apa ia nanti djadi koerang tjinta pada akoe, sebab ia soeka pada laen orang djoega?"
Sabenernja Athos tiada sekali kira, Raoul nanti brangkat begitoe tjepet, tapi sebab itoe perkara boleh bikin Raoul poenja hati djadi lebi senang, Athos djadi hiboerken hatinja sendiri.
Djem poekoel sapoeloe pagi semoea soeda sedia boeat brangkat. Sedeng Athos liat Raoul naek koedanja, satoe boedjang dari njonja hertogin de Chevreuse dateng. Ia soeda diprenta boeat kasi kabar, njonja hertogin telah dapet kabar Raoul soeda poelang dari medan prang dan ia njonja hertogin telah dapet kabar baek dari hal perboeatannja itoe anak moeda, maka itoe njonja prenta orangnja boeat kasi alamat pada graaf de la Fere.
„Bilang pada njonja hertogin,“ kata Athos, „toean burggraaf baroe naek koeda boeat pergi koendjoengin njonja hertogin.“
Sasoedanja pesen bebrapa perkata’an pada Grimaud, Athos kasi tanda, iaorang boleh brangkat.
