— 155 —
pergi di Blois, itoe perkara ada pantes.“
„Djadi kau soeka kasi idzin ?“ Raoul treak dengen girang.
—„Tentoe sekali, Raoul.“
—„Bilang toroes terang, toean, apa kau tiada djadi goesar?
—„-Tiada sekali kali. Kenapa akoe moesti djadi goesar boeat satoe perkara jang boleh bikin kau djadi senang?“
„O, toean, kau soenggoe baek!“ kata Raoul jang roepa roepanja maoe toebroek Athos boeat pelok padanja, tapi kerna kwatir djadi koerang hormat, ia tiada brani teroesken niatnja.
Athos angsoerken tangannja.
„Apa akoe boleh brangkat sekarang?“ menanja Raoul
„Kapan sadja kau soeka, Raoul, menjaoet Athos.
Raoul djalan kaloear, tapi di bétoelan pintoe ia brenti.
„Toean,“ ia kata, akoe inget, „njonja hertogin de Chevreuse soeda toeloeng akoe dengen itoe soerat boeat poedjiken akoe pada toean prins, akoe haroes mengoetjap trima kasi padanja.“
—„Kau niat boeat ketemoeken padanja, Raoul?“
—„Akoe kira baek begitoe, tapi toean moesti kasi poetoesan dalem ini oeroesan.“
—„Ambil djalanan jang liwat di astana de Luynes dan ianja di sana, apa kau boleh ketemoe pada njonja hertogin. Dengen senang akoe liat kau taoe atoeran. Grimaud dan Olivain toeroet pada kau.“
„Sampe doea pengikoet, toean?“ menanja Raoul dengen heran.
Athos manggoet dan Raoul djalan kaloear.
