— 151 —
—„Akoe tiada bisa doega itoe perkara, tapi sama djoega, djikaloe kau soeda taoe, akoe tiada perloe minta ketrangan lebi djaoe. Apa kau soeka toeroet bersantab dengen akoe Mylord ?“
—„Trima kasi, graaf, sabenernja akoe moesti mengakoe, datengnja itoe anak soeda bikin akoe ilang napsoe dan brangkali akoe tiada nanti bisa tidoer djoega. Perloe apa ia dateng di Parijs? Tentoe boekan boeat ketemoe pada akoe, kerna ia tiada dapet taoe akoe soeda brangkat dari negri Inggris. Akoe boeat kwatir itoe anak, sobat, akoe doega tentoe pengabisannja nanti djadi satoe perkara dara.“
—„Apa ia bikin di negri Inggris ?“
—„Ia ada satoe penggawenja Cromwell jang paling dipertjaja.“
—„Begimana ia boleh djadi tjampoer dengen itoe koempoelan? Djikaloe akoe tiada sala, ajah dan iboenja ada anoet agama Katholiek.
—„Ja tjampoer dengen orang pembrontakan lantaran ia bentji pada Radja.“
—„Bentji pada Radja ?“
—„Ja, Radja soeda kaloearken prenta ia tiada boleh diakoe sebagi satoe anak dari akoe poenja soedara, ia tiada dikasi idzin pake nama de Winter dan hartanja dirampas.“
—„Siapa namanja sekarang?“
—„Mordaunt. Satoe puritein (nama pojokan boeat orang orang jang anoet agama protestant) dengen menjaroe sebagi satoe padri Katholiek ia soeda djalan di koeliling negri Frans.“
—„Menjaroe sebagi satoe padri Katholiek, kau bilang?“
—„Ja, apa kau tiada dapet taoe itoe perkara?“
