— 140 —
Mordaunt doega, itoe perkata'an nanti bikin de Winter djadi sanget moerka, tapi ia soeda doega sala. De Winter inget kombali apa Mylady soeda berboeat doeloe, ia berbangkit dengen sabar dan awasin moekanja Mordaunt.
„Kau ingin taoe sampe abis itoe resia, toean?" kata de Winter. ― „Baek, kau nanti denger! Akoe nanti tjeritaken hal ichwalnja itoe orang prempoean, kerna itoe orang prempoean soeda ratjoenin akoe poenja soedara sampe binasa dan boeat dapet akoe poenja harta, ia tjoba boeat bikin binasa akoe djoega. Akoe ada ketrangan sampe tjoekoep. Abis apa kau maoe bilang sekarang?"
― „Ia ada akoe poenja iboe !“
― „Satoe orang jang idoep senang dan baek ia soeda boedjoek sampe djadi pemboenoenja hertog van Buckingham. Dari ini perkara djoega akoe ada sampe banjak ketrangannja, abis begimana ?“
― „Ia ada akoe poenja iboe!“
― „Sasoedanja balik ka negri Frans ia ratjoenin sampe binasa djiwanja satoe njonja moeda jang ditjinta oleh moesoenja itoe iblis. Apa kau maoe bilang, ia ada alesan pantes boeat berboeat begitoe roepa? Dari ini perkara akoe djoega ada ketrangan sampe tjoekoep.“
„Ia ada akoe poenja iboe !“ treak itoe anak moeda jang tiap tiap kali ia oelang ken itoe bebrapa perkata'an, swaranja djadi semingkin kras.
„Pengabisannja,“ kata de Winter, „sasoedanja ia berboeat begitoe banjak kedjahatan, di bentji oleh sekalian orang, tapi masi mengantjem pada moesoenja sebagi satoe matjan jang soeda mogok, ia djato di tangannja bebrapa orang
