— 127 —
itoe perkara, akoe tjoema denger sadja orang tjerita, kabarnja perkara inten.“
—„ Betoel dalem perkara begitoe roepa, njonja. Itoe ampat orang soeda toeloeng pada Permisoeri Anna dan djikaloe akoe inget itoe perkara, akoe moesti djadi tersenjoem kesian. Sri Baginda tiada kenal pada Iaorang, tentoe lantaran Ratoe Anna soeda loepaken iaorang, sedeng seharoesnja itoe ampat orang moesti dapet pegang sala satoe djabatan jang moelia.“
—„Djikaloe begitoe orang moesti tjari iaorang sampe dapet, Mylord; tapi apa ampat orang bisa berboeat, atawa lebi baek dibilang, tiga orang sadja ? Akoe oelangken lagi, kau tiada oesa harep pertoeloengannja d'Artagnan.“
—„Satoe sendjata koerang, tapi masi ada tiga dan dengen akoe djadi ampat orang jang bisa djaga dengen setia pala Radja, lindoengken padanja di medan prang, bantoe pikiran pada waktoe berempoek bitjaraken kita poenja oeroesan dan djikaloe sampe dikalaken moesoe ada kawan jang boleh bantoe ia lari dan berdaja boeat menjebrang ka ini negri. Apabila kita soeda ada di sini, maski Mazarin tiada soeka, kita bisa dapet tempat boeat berlindoeng, sebagi satoe boeroeng laout pada waktoe ada ombak dan angin besar selamanja bisa tjari tempat, di mana ia bisa semboeniken dirinja dari bahaja.“
—„Tjari, Mylord tjari itoe orang orang bangsawan, dan djikaloe kau soeda ketemoe padanja dan iaorang soeka boeat toeroet kau poenja voorstel boeat pergi ka negri Inggris, akoe berdjandji, apabila kita orang bisa naek lagi atas tachta karadja'an, akoe nanti kasi cepa masing masing satoe tana, atas mana berikoet
