— 120 —
hatinja koetika ia soeda tinggal saorang diri. Pada kadoea fihak akoe tiada ada berdjandji satoe apa. Hm! itoe Cromwell betoel betoel ia ada satoe pemboeroe Radja. Kesian orang orang jang djadi mantrinja. Bernouin!
Bernouin dateng masoek.
Mazarin kata pada orangnja:
„Prenta orang boeat liat, apa itoe anak moeda jang ramboetnja pendek dan berpake djas item, itoe orang jang baroesan kau anter masoek, masi ada dalam astana.“
Bernouin kaloear. Mazarin goenaken itoe tempo boeat balik lagi mata tjintjinnja jang ia gosok bikin terang, kamoedian ia pandang itoe inten.
Bernouin dateng kombali dengen Comminges jang itoe koetika ada kapalaken barisan pendjaga di astana.
„Monseigneur,“ kata Comminges, „koetika akoe anter itoe anak moeda jang Eminentie prenta boeat tanja, apa ia masi ada di sini, itoe anak moeda soeda menengok di betoelan pintoe katja, kamoedian dengen bengong ia awasin itoe djoeroesan bebrapa lamanja, brangkali ja liat itoe pigoera di sebrang pintoe. Akoe liat ia soeda naek koedanja boeloe daoek dan djalan kaloear dari astana. Apa Monseigneur tiada maoe pergi pada Sri Ratoe?“
— „Boeat apa?“
— „Akoe poenja oom, toean de Guitaut, baroesan tjerita pada akoe, Sri Baginda telah trima kabar dari medan prang.“
— „Baek, akoe lantes mengadep pada Sri Baginda“
Itoe koetika toean de Villequier dateng boeat minta Kardinaal dateng pada Sri Ratoe.
