— 108 —
sobat; tapi akoe tiada dapet taoe, Karel I soeda kasi poetoesan, boeat rampas akoe poenja harta dan bikin djato akoe poenja deradjat.“
— „Sekarang akoe mengarti, lantaran apa kau bekerdja pada Olivier Cromwell. Kau bentji kau poenja Radja.“
— „Betoel, Monseigneur, akoe bentji padanja!“
Mazarin dapet liat, begimana moekanja itoe anak moeda beroba djadi sanget kedjem matjemnja; biasanja orang, djikaloe ia mara, moekanja djadi mera lantaran daranja jang soeda djadi panas dan naek di moekanja, tapi pada ini anak moeda roepa roepanja moekanja dapet warna dari ia poenja njali, hingga kelitannja djadi poetjet dan sanget menakoetin orang.
„Kau poenja perdjalanan ada sanget sedi toean,“ kata Mazarin, „dan bikin akoe poenja hati djadi kesian; baek djoega kau sekarang ada poenja satoe toean jang sanget besar kekwasa'annja. Ia nanti toeloeng tjari ketrangan dalem kau poenja oeroesan, kerna orang orang jang oeroes pamerentahan negri bisa dapet banjak ketrangan.“
„Monseigneur,“ kata itoe orang, „satoe andjing memboeroe jang baek tjoema perloe dapet baoeken moelanja sadja dan ia nanti tjari sampe dapet maksoednja.“
„Apa kau brangkali ingin akoe bitjara pada kau poenja keponakan ?“ kata Mazarin dengen berpikir tiada djahatnja ada poenja satoe sobat jang djadi kapertjaja'annja Olivier Cromwell.
— „Trima kasi, Monseigneur. Akoe nanti bitjara sendiri padanja.“
— „Tapi baroesan kau sendiri bilang, ia
