— 74 —
Tapi sedeng d'Artagnan lagi mara pada Kardinaal, ini orang kikir lagi gosok tangannja djadi satoe, kerna girang.
„Saratoes pistol,“ ia kata, „saratoes pistol! boeat saratoes pistol akoe soeda dapet taoe satoe resia, boeat apa Kardinaal Richelieu brangkali soeda kaloearken oewang doeapoeloe riboe dukaat. Blon di'itoeng harganja ini tjintjin jang paling sedikit masi ada berharga sapoeloe riboe francs.“
(Tjintjin jane Ratoe Anna kasi padanja boeat disampeken pada d'Artagnan, itoe ferdana mantri soeda poenjain sendiri.)
Kamoedian Kardinaal masoek dalem kamarnja dan simpen itoe tjintjin di satoe tempat, di mana ada laen laen barang permata; sasoedanja simpen itoe tintjin, ia panggil Bernouin boeat toeloeng ia boeka pakeannja. Dari loear astana kadang kadang masi ada kadengeran swara orang menembak, maski itoe koetika soeda liwat djem poekoel sablas tenga malem.
d'Artagnan saorang diri djalan poelang ka tempatnja di hotel „de Ree“. Sablonnja troesken ini tjerita baek ditjeritaken lebi doeloe begimana d'Artagnan soeda djadi tinggal di itoe hotel.
− − − −
VI.
Dalem tempo jang soeda berselang antara tjerita dari „Tiga panglima prang“ sampe pada waktoe ini perkara ditjeritaken lagi, soeda kedjadian roepa roepa perkara. d'Artagnan tiada ada kasi liwat tempo jang baek boeat iapoenja kebaean, tapi itoe tempo baek tiada ada.
Sasoedanja ia diangkat djadi luitenant, bermoela ia pinda di laen roema makan, tapi kira kira berselang anem taon lamanja ia soeda pinda
