— 72 —
ada, kerna dalem tempo doeapoeloe taon lamanja akoe djadi luitenant akoe tjoema bisa bikin oetang djadi lebi besar sadja djoemblanja.“
Mazarin tinggal diam sebagi orang jang masi sanget brat ambil satoe poetoesan; kamoedian ia hampirken satoe lemari jang dikoentji dengen tiga roepa kontji, dari dalem itoe lemari ia kasi kaloear satoe kantong jang ia timbang timbang di tangannja bebrapa kali, kamoedian ia seraken pada d'Artagnan.
„Na, ambil ini oewang boeat onkost di djalan,“ kata Kardinaal dengen mengela napas.
„Djikaloe ini kantong ada berisi oewang dubloenen atawa oewang dukaat sadja, brangkali kita bisa troes djalanken perkaranja,“ d'Artagnan pikir dalem hatinja.
Ia kasi hormat pada Kardinaal dan kasi masoek itoe kantong dalem sakoenja.
„Sekarang djadi soeda tetep begitoe,“ kata Kardinaal, „kau pergi melantjong....“
― „Ja, Monseigneur,“
― „Saben hari kau moesti toelis pada akoe, soepaja akoe dapet taoe, begimana adanja ini oeroesan jang kita inginken.“
― „Akoe tiada nanti loepaken itoe perkara, Monseigneur.“
― „Baek. Tapi siapa namanja kau poenja kawan ?“
„Nama dari akoe poenja kawan?“ menanja d'Artagnan dengen sedikit kwatir.
„Ja,“ kata Kardinaal, „sedeng kau pergi akoe nanti tjari ketrangan dan barangkali akoe bisa dapet taoe di mana iaorang ada.“
„Graaf de la Fère, jang dipanggil djoega Athos,“ kata d'Artagnan, „toean du Vallon alias Porthos dan ridder d'Herblay, sekarang ia di
