— 301 —
ingin dahar itoe koewe. Barang makanan jang laen djoega roepanja sedep.
Itoe koetika semoea soeda abis sabarnja; pendjaga pendjaga ingin dapet idzin bosat pergi di loear; La Ramee ingin dahar barang makanan jang lesat rasanja dan hertog de Beaufort ingin kalosar dari pendjara.
Tjoema Grimaud saorang diri tiada beroba moekanja. Ampir boleh di bilang Athos adjar padanja boeat berlakoe sebagi orang gagoe, tjoema boeat menoeloeng dalem ini oeroesan sadja.
Tiada lama poela La Ramee kasi idzin soldadoe pendjaga boeat pergi senangken iaorang poenja diri diloear benteng, dan koetika itoe pendjaga pendjaga soeda kaloear, La Ramee koentji sendiri pintoe pintoe dan koentjinja ia kasi masoek dalem sakoenja.
Ia hampirken hertog dan oendjoek dengen tangannja medja, dengen apa ia maoe bilang:
„Djikaloe padoeka soeka.“
Hertog menengok boeat liat Grimaud jang lantes liat lotjeng. Itoe koetika baroe djem saprapat liwat poekoel anem dan pada djem toedjoe iaorang moesti bekerdja, djadi masi moesti menoenggoe tiga prapat djem. Boeat tempo lebi doeloe hertog minta idzin boeat batja doeloe sampe abis satoe bagian tjerita jang ia lagi batja.
La Ramee menengok boeat liat boekoe apa boleh bikin hertog sampe loepa pada barang makanan jang keliatannja begitoe lesat, ia dapet liat boekoe jang lagi dibatja ada satoe tjerita dari hal Julius Cesar, jang maski soeda dilarang oleh toean de Chavigny, ia La Ramee soeda kasi djoega itoe boekoe di pindjem oleh hertog.
