— 238 —
—„Boleh, tapi dengen perdjandjian jang ia tiada nanti tjampoer champignons dalem pasteinja kerna champignons dari Vincennes ada koerang baek boeat akoe poenja familie“
La Ramee tiada mengarti sindirannja hertog de Beaufort lantes djalan kaloear dan lima minuut kamoedian satoe officier politie dateng masoek boeat temenken hertog, tapi sabenernja ia poenja dateng ada berhoeboeng dengen prentahannja Kardinaal Mazarin, jang sebrapa boleh maoe soepaja persakitan djangan sampe di tinggal saorang diri.
Tapi dalem tempo itoe lima minuut hertog soeda batja lagi soerat jang ia trima dari ketjinta'annja, dalem mana ada ditoelis orang orang lagi berdaja boeat toeloeng padanja. Begimana itoe perkara maoe di atoer, itoe tiada sekali di trangken, Maski Grimaud tiada soeka banjak bitjara, hertog maoe tjoba tanja padanja, Hertog soeda dapet pikir Grimaud sengadja berlakoe kras padanja, soepaja djangan sampe orang sangka jang ia Grimaud nanti bikin perhoeboengan resia dengen orang hoekoeman dan lantaran begitoe hertog djadi pertjaja jang Grimaud ada saorang tjerdik, maka ia maoe toeroet sadja apa jang Grimaud nanti minta padanja.
XXI.
Stenga djem kamoedian La Ramee balik kombali dengen senang pikirannja sebagimana biasanja orang jang soeda dapet dahar barang makanan jang lesat rasanja dan soada minoem anggoer baek. Hawa oedara djoega bagoes, maka tiada ada halangan satoa apa boeat maen kaats. Biasanja di Vincennes iaorang maen kaats di satoe lapangan, oleh kerna itoe dengen gampang
