— 228 —
lagi ketawa, tjoema Grimaud sadja jang tiada ketawa.
Grimaud hampirken La Ramee dan oendjoek itoe kepiting jang digantoeng, ia kata:
„Kardinaal!"
„Digantoeng oleh Zijne Hoogheid hertog de Beaufort," hertog samboeng perkata'annja Grimaud, dan oleh meester La Ramee, kepala politie Radja."
La Ramee lompat dengen bertreak, ia lantes ambil itoe gantoengan, indjek indjek bikin pata dan lempar kaloear dari djendela, ia soeda djadi sanget mara dan maoe indjek itoe kepiting djoega, tapi Grimaud tjega ia berboeat begitoe dengen ambil itoe kepiting dan kasi masoek dalem sakoenja.
„Boleh di dahar," ia kata.
Perkara gantoeng itoe kepiting soeda bikin hertog djadi begitoe soeka hatinja, hingga ia tiada djadi goesar pada Grimaud, tapi koetika kamoedian ia pikirken lagi itoe perkara, hertog djadi semingkin mara pada Grimaud jang soeda ganggoe dan tjega la poenja niatan boeat hinaken Kardinaal lebi djaoe.
Ini perkara kepiting soeda djadi di tjeritaken di seantero pendjara, hingga La Ramee djadi sanget djengkel, tapi toean de Chavigny, jang dalem hatinja ada bentji pada Kardinal, sengadja soeda tjeritaken pada doea tiga sobatnja dari hal itoe perkara kepiting digantoeng dengen harepan jang itoe perkara nanti djadi tersiar dalem kota Parijs dan Mazarin djoega dapet denger itoe hal.
Sala satoe soldadoe pendjaga hertog jang roepanja ada sedikit lebi pantes dari laen laen soldadoe soeda kena tarik hatinja itoe hertog,
