— 226 —
Grimaud jang seraken itoe sisir pada La Ramee.
„Akoe kira akoe tiada bisa djadi penoedjoe pada itoe orang," kata hertog.
Di dalem satoe tempat hoekoeman memang orang masing masing djadi beroba laen adatnja, di tempat begitoe tjoema ada doea roepa sadja, jaitoe soeka dan bentji, lantaran iaorang terpaksa bertjampoeran satoe pada laen.
Grimaud jang sebrapa boleh soeda berboeat, soepaja gouverneur dan La Ramee djadi soeka padanja, boekan maoe bikin hertog bentji padanja, tapi soepaja itoe hertog koerang soeka sadja.
Itoe perkara hertog tiada pikir lama dan sigra ia dapet inget satoe perkara boeat bikin Mazarin djadi mara lagi. Boeat dahar besok ia soeda minta dikirim kepiting reboes. Itoe kepiting boekan ia niat dahar, tapi ia soeda bikin satoe pegantoengan dan itoe kepiting maoe diandeken sebagi Mazarin jang ia nanti gantoeng dalem kamarnja.
Kajoe boeat tiang pegantoengan soeda sedia, tjoema kampaknja blon ada dan boeat itoe perkara hertog soeda ambil sapotong glas jang ia gosok bikin tadjem.
Besoknja koetika La Ramee dan Grimaud ada dalem kamar ia moelai bikin sedia itoe pegantoengan, petja'an glas soeda digosok tadjem tinggal di'iket sadja dengen sapotong benang, tapi koetika ia balik di medjanja, itoe petja'an soeda tiada ada.
— „Siapa soeda ambil akoe poenja petja'an glas ?“ menanja hertog dengen mars.
Dengen satoe tanda Grimaud bilang, ia soeda berboeat begitoe.
— „Apa? Kau lagi? kenapa kau ambil itoe barang ?“ kata hertog.
