— 151 —
bilang, tapi akoe tjoema saorang diri di antara itoe semoea.“
— „O, akoe mengarti sekarang, kau ada di antara orang orang ketjil, pada siapa kau tiada bisa bergaoelan, djikaloe kau tiada maoe djadi kau poenja deradjat toeroen.“
Porthos poenja moeka djadi poetjet dan dengen tjepet ia minoem satoe glas penoe dengen anggoer.
„Boekan, djoestroe sebaliknja,“ kata Porthos, „sekalian toean toean tana deket ini tempat ada orang orang bangsawan. Koetika akoe baroe pinda di sini, akoe sebagi orang baroe moesti moelai koendjoengin iaorang; akoe berboeat itoe perkara, tapi kau sendiri taoe, sobat, njonja du Vallon....“
Porthos tiada bisa bitjara troes.
„Njonja du Vallon,“ kata poela Porthos sasoedanja menapas doeloe, „sebagimana kau taoe, doeloe istrinja satoe procureur den boekan toeroenan bangsawan. Itoe orang orang bangsawan brani tjela itoe perkara dengen berdepan ; kau tentoe mengarti, akoe nanti boenoe iaorang maski brapa besar djoega djoemblanja, pendeknja akoe soeda bikin binasa doea orang, jang laen djadi tiada brani bertingka lagi, tapi lantaran itoe perkara akoe tiada ada poenja sobat, pada siapa akoe bisa bergaoelan. Akoe di sini djadi idoep tjoema boeat makan-minoem sadja.“
D'Artagnan tersenjoem, ia soeda dapet doega, apa jang Porthos inginken dan ia sedia boeat goenaken itoe waktoe jang baek.
„Tapi kau sendiri ada toeroenan baek dan lantaran kau poenja istri, kau poenja deradjat tiada bisa djadi toeroen,“ kata d'Artagnan.
„Ja, tapi kau mengarti,“ menjaoet Porthos,
