— 146 —
„Loepaken toean!" kata: Mousqueton, ampir tiap tiap hari ia bitjara dari toean dan ia sring harep sala satoe hari ia nanti dapet kabar, toean soeda diangkat djadi maarschalk boeat djadi pegantinja toean de Gassion atawa maarschalk de Bassompierre."
D'Artagnan tersenjoem koetika donger itoe perkata’an.
„Kau orang,“ kata Mousqueton pada itoe orang pengrawat kebon, „toenggoe di sini boeat djalanken prentanja graaf van d’Artagnan, djikaloe brangkali ini toean soeka prenta apa apa pada kau orang, sampe akoe kombali.“
Dengen pertoeloengannja doea orang, Mousqueton naek lagi koedanja jang ia lantes lariken tjongklang menoedjoe ka roema toeannja
„Ha, di sini keliatannja berbeda sekali!" kata d’Artagnan, „tiada ada jang menjaroe, tiada ada politiek dan tiada ada jang tarik moekanja djadi pandjang, semoea keliatannja senang, aer mata kaloear dari sebab girang hatinja dan sapoeternja poehoen poehoen keliatan sebagi sengadja dibikin boeat bikin senang orang poenja pikiran.”
„Dan akoe," kata Planchet, „soeda dapet baoeken daging digoreng; rasanja akoe dapet liat koki dan boedjang boedjang semoea tiada sempet bekerdja boeat soegoeken kita dahar barang makanan jang lesat rasanja. O, toean, begimana toean de Pierrefonds berlakoe pada pengikoetnja, sedeng koetika ia masi bernama toean Porthos ia soeda begitoe baek dan sanget soeka pada barang makanan jang lesat rasanja."
„Kau poenja perkata’an bikin akoe djadi kwatir, Planchet,“ kata d’Artagnan, „Djikaloe keada’annja betoel sebagimana kita doega, akoe poenja oeroesan tentoe nanti djadi kepiran lagi.
