— 140 —
djoega, tjoema ia minta, soepaja d’Artagnan soeka brangkat pada waktoe malem dari kota Parijs, kerna ia masi kwatir, orang nanti kenalken padanja. D'Artagnan kasi nasehat boeat panggil istrinja Planchet dateng di roema makan de Reé, soepaja ia tiada djadi kwatirken swaminja, tapi Planchet jang lebi kenal adat istrinja, tiada satoedjoe dengen itoe pikiran. Ia kata, istrinja tiada nanti djadi mati lantaran pikirken di mana ia ada, tapi ia sanget kwatir, istrinja jang sanget soeka bitjara banjak, nanti boeka resianja, apabila ia dapet taoe, dimana Planchet ada semboeni.
D'Artagnan tiada ada kebratan boeat toeroet Planchet poenja maoe dan itoe malem djem poekoel delapan sore iaorang brangkat dari hotel de Ree menoedjoe ka Dammartin, dimana pada djem poekoel doeablas malem iaorang sampe dan menginep di hotel de Zwaan.
Besok paginja d’Artagnan minta sedikit ketrangan pada toean roema makan, tapi itoe orang ada toeroenan orang dari Normandie jang soeda terkenal sebagi orang jang sanget tjerdik, tapi selamanja kwatir ketarik dalem sala satoe perkara, hingga ia selamanja tiada maoe menjaoet dengen tentoe, selaloe poeter sadja omongannja.
Dari apa jang ia soeda dapet denger dari itoe orang d’Artagnan doega sadja, ia moesti ambil djalanan sebla kanan, maka ia ambil itoe djoeroesan; pada djem poekoel sembilan pagi ia sampe di Nanteull. Kabetoelan jang poenja roema makan ada saorang asal dari Picardye dan koetika ia dapet kenalken Planchet ada saorang asal dari satoe provincie, ia tiada bikin kebratan satoe apa boeat kasi ketrangan dengen betoel.
