— 130 —
—„Tapi keada'an di ini masa masi ada di tangannja Mazarin.“
—„Tapi iapoenja kekwasa'an tiada bisa lama lagi, sekarang parlement dan rahajat negri soeda bentji padanja dan orang orang bangsawan djoega tiada berfihak padanja, itoe doea perkara mengartinja tiada ada poenja oewang dan tiada ada banjak bantoean dalem bagian balatentara.“
D'Artagnan garoek kepalanja, ia moesti mengakoe, apa jang Aramis soeda berkata ada dengen sebenernja.
„Begimana kau kira akoe poenja pikiran, d'Artagnan,“ kata Aramis,,apa akoe masi bisa doega itoe perkara sebagimana doeloe akoe biasa kerdjaken itoe perkara ? Tapi brangkali koerang baek akoe bitjara troes trang pada kau, kerna kau ada pada fihaknja Mazarin, dan maoe tjoba boeat tarik akoe dalem itoe oeroesan.“
— „Akoe? sama sekali tiada ada itoe niatan.“
— „Baroesan kau bilang, kau diprenta koempoelken kau poenja kawan.“
— „Apa akoe ada bitjara jang akoe diprenta ? Djikaloe begitoe akoe soeda sala bitjara. Boekan begitoe, akoe pikir sama dengen kau: oeroesan negri sedeng koesoetnja, biar kita liat begimana glagatnja, kamoedian kita berampat djali satoe lagi. Ini sekali tentoe ada barang jang lebi berharga dari satoe tjintjin inten, jang boleh dapet dirampas.“
— „Itoe betoel, d'Artagnan, bedanja tjoema kau sendiri soeda dapet itoe pikiran, sedeng akoe jang tiada begitoe tjerdik sebagi kau, soeda dapet itoe pikiran lantaran denger bitjara'annja laen orang. Toean coadjutor jang telah denger dari kita poenja perboeatan di doeloe
