220
PENGHIDOEPAN
Sigra ia boeka pintoenja itoe kamar studie dari mana akoe berlaloe. Dari sitoe dengen dangsoeng akoe menoedjoe ka akoe poenja kamar tidoer dan baringken dirikoe jang merasa tjape hingga tida sebrapa lama lagi akoe djato poeles.
⁂
Besok paginja Zara telah dateng ka kamarkoe boeat samboet sama sama sang pagi jang permei. Ia kaliatan sehat, seger dan eilok sebagimana biasa seperti boenga wasiat jang tida bisa lajoe. Begitoe berdjoempa padakoe lantas ia memeloek sambil berkata:
„Pagi-pagi sekali akoe telah bitjara ampir satoe djam sama Casimir. Ia telah toetoerken padakoe segala apa. Kaheranan - kaheranan bagimana jang kaoe soedah beroentoeng dapet saksiken! Dan apa kaoe tida merasa poewas, dear? Apa kaoe ini waktoe tida tjoekoep tegoeh. sentausa dan beroentoeng?“
„Tjoekoep sekali!“ akoe djawab. „Tapi, oh Zara! brapa sajang bahoea ini doenia tida dapet taoe apa jang kita telah taoe!“
„Ja, apa maoe dikata, kerna kabanjakan manoesia soeka maoe bawa tjara sendiri,“ Zara menjaoet. „Biarlah itoe pengatahoean jang kaoe soedah boektiken dan dapetken sama-sama bisa dirasaken sarinja oleh kaoe sadja atawa sedikit orang jang soedah insjaf.“
„Oh, kaloe sadja marika taoe!“ akoe mengeloeh pada diri sendiri.
