276
PENGHIDOEPAN
soekalah kaoe terangin padakoe kenapa kaoe tjintaken Zara?"
,,Kenapa !?" ia menjaoet dengen sedikit membentak. ,,Kenapa, boekan laen sebab memang akoe ketarik boeat djato hati padanja.
,,Itoe akoe mengarti. Tapi tjoba kaoe terangin lantaran-lantaranja hingga kaoe begitoe ketarik sama Zara?" akoe menanja poela.
Ia awasin akoe sakean lama seperti ia merasa heran denger pertanjakankoe jang loear biasa boeat iapoenja pikiran.
,,Ja, kerna ia ada prampoean jang paling eilok jang akoe perna liat di antero benoea!" ia berkata achirnja dengen soeara bergoemeter serta roepa jang doeka.
,,Apa tjoema sabegitoe sadja ?" akoe menegesin. ,,Oh, lantaran iapoenja badan kasar ada sanget elok—lantaran iapoenja bibir begitoe manis dan koelitnja aloes laksana soetra; lantaran iapoenja potongan badan membetot hati dan ramboetnja item gompiok mengkilap seperti awan mendoeng jang tertodjo oleh tjahaja remboelan. Itoelah jang membakar darahmoe hingga kaoe namaken itoe napsoe renda ,,tjinta"? Baekan kaoe kasih laen panggilan dari kaoe bilang sifat-sifat demikian tjinta adanja! Pikirlah, itoe roman tjantik jang terloekis atas dirinja Zara aken dikroeboetin belatoeng tanah; semoet-semoet aken grajangan dan bersarang dalem iapoenja ramboet jang gompiok; rajap-rajap jang bermillioen djoemblahnja aken makan abis iapoenja darah daging dan toelang--
