— 841 —
ada ditjeritaken di dalem soewatoe kitab?"
„Tida begitoe, Njonja kerna di sana poen ada pengadilan, hingga siapa kedapetan meratjoeni ija digantoeng atawa ditabas batang lehernja; tapi orang-orang sana ada poenja akal bagoes aken lindoengken diri dari pada hoekoeman. Ija orang tida meratjoeni tjara bodo, seperti orang-orang di sini, hingga sebentar djoega kesalahannja lantas ternjata."
„Apa orang-orang sana telah dapetken kombali rasianja aqua tofano, ijang dikataken telah hilang?"
„Tida ada satoe apa ijang terhilang di doenia ini, Njonja! Segala ilmoe ada djalan koeliling; barang-barang ada bernama lain."
„Benar sekali! kaoe ini poen satoe ahli kimia ijang teroetama, itoe ajer obat ijang kaoe telah kasih anakkoe minoem dan sedarken dia dengen lekas dari pada pangsannja.....'
„Oh, djangan terlaloe pertjaja, ijang obat itoe baik soenggoeh, Njonja! satoe tétès ada tjoekoep aken sedarken itoe anak dari pangsannja; tapi tiga tétés nanti bikin hatinja bergojang keras; anem tétés nanti bikin ija kalengar; sapoeloeh tétés boleh poetoesken djiwanja. Itoelah sebabnja, Njonja! maka tempo anakmoe merabah pada pelesnja obat itoe, saja lantas tjegahken."
„Kaloe begitoe, obat itoe soewatoe ratjoen besar?"
„Boekan. Njonja! kerna haroeslah djoega kita berkata, bahoewa tida sekali ada ratjoen, sebab di dalem ilmoe mengobati, ratjoen ijang paling djahat poen, kaloe dipergoenaken sebagimana ijang perloe, ada djadi obat ijang moestadjab."
„Apatah adanja obatmoe itoe ?"
„Itoelah saroepa ajer obat boewatannja sobatkoe Adalmonte, ijang telah bri taoe padakoe tjara bagimana misti goenaken
