Pembalesannja Kawanan Liangsan/Bagian katiga/Bab 15
XV
Tjio Keng merasa poewas, kerna sasoeda
dapetken kombali miliknja, bisa
membales sakit hati.
Sabelonnja doea orang itoe ka loear, di pintoe depan kadengeran soearanja Liok Siang jang baroe poelang. Itoe djahanam, satelah liat maitnja njonja Thio Tek dan banjak dara ada berhamboeran di salebar tana, djadi amat kaget dan rantang jang dipegang olehnja djadi telepas zonder dirasa.
„Apa? Mengapatah boleh djadi begini roepa?“ tanja ia dengen soeara jang tertahan: „Ah, tjilaka! Tjilaka bener!“
Lebi terkedjoet lagi waktoe dari dalem ada kadengeran soeara orang jang berkata:
„Hola, kaoe baroe poelang, Liok Siang! Akoe soeda menoenggoe lama sekali!“
Liok Siang mengawasi dengen mata mentjorot. Sedeng itoe orang jang baroesan berkata kombali:
„Kaoe fentoe masi kenalin siapa adanja akoe ini, boekan? Maka akoe tida perloe kasi taoe lagi namakoe padamoe.” Itoe waktoe djoega Liok Siang lantas kenalin, baheewa itoe orang ada korbannja jang doeloe, jang disangka telah mati dalem aer. Dengen moeloet menganga ia memandang seperti orang kasima, tapi, Bok Tjoen jang soeda denger djahanam itoe telah poelang, laloe. berlompat sambil berkata:
"Boeat apatah kita boewang tempo.aken bitjara pada sagala manoesia begitoe roepa, Hajoe kasi sadja bagiannja.”
Liok Siang dijadi lebi kaget. Sebati baroe ia taoe, bahoewa Tjio Keng jang ada di hadepannja, boekan roh, hanja manoesia idoep jang dateng hendak bikin pembalesan atawa minta kombali itoe milik jang terampas.
Dengen tida berkata soeatoe apa Liok Siang lantas berlompat ka loear dan teroes melariken diri. Tapi baroe sadja bertindak doea-tiga langka, ia djato dan kadoea moesoenja telah sampe di blakang.
Bok Tjoen oetjapken bebrapa perkatahan jang menjataken rasa djemoe dan gemesnja, tapi Tjio Keng lantas berkata: boeat apatah berkata-kata pada orang begini. Dan sahabisnja kata begitoe ia angkat goleknja dan tabasken itoe di batang lehernja Liok Siang, jang sigra djoega djadi terpoetoes.
„Hm! sekarang kaoe mampoes, manoesia kedji!" kata Tjio Keng dengen soeara menggerendang: „kaoe tida bisa makan wangkoe jang dirampas, tapi djiwamoe sendiri djadi korbannja golok!"
Kamoedian sasoedanja lemparken mait, kadoeanja itoe laloe berdjalan kombali ka tempat jang tadi sembari memanggoel boengkoesan oewang.
Hatinja Tjio Keng meras legah, kerna sekarang boekan sadja telah dapet ko mbali itoe milik jang terhilang, tapi moesoe-moesoenja poen semoea telah binasa tjara jang mamɔewasken hati.
la merasa bersoekoer betoel pada itoe sobat baek, jang dengen pertoeloengannja, apa jang bermoela tida diharep, sekarang terdapet. Kadoeanja itoe berdjalan sadja dengen pelahan, tida lama telah sampe di itoe kebon tempat dimana Ouw Pit-koh lagi mematjoel. Dan waktoe baliknja poen, itoe orang toea masi sadja lakoeken kerdjahannja dengen giat.
„Bagimana dengen oeroesan menjewa praoenja Liok Siang?, Siauw Long?!“ berseroeh tioe orang toea, waktoe Bok Tjoen dan Tjio Keng telah mendatengi: „baroesan akoe liat itoe Liok Siang telah poelang dengen bawa banjak barang belandjahan. Djaditah kaoe sewa kandarannja?“
Tapi sabelonnja orang jang ditanja menjaoet, Ouw Pit-koh telah berkata kombali :
„Kaoe bawa boengkoesan, boengkoesan apa itoe?“
„Djangan goesar, lantaran ada oeroesan penting, hingga tida ada tempo boeat kita-orang bitjara lama-lama," saoetnja Bok Tjoen sambil berdjalan teroes, sedeng Tjio Keng tjoema mengikoeti sadja dari blakang.
„Soeda beres tentoe oeroesannja," kata itoe orang toea sambil mengawasi Bok Tjoen dengen kawannja, jang berdjalan satjepet-tjepetnja.
Pit-koh angkat kombali patjoelnja dan mematjoel teroes.
Tida lama Bok Tjoen dan Tjio Keng telah sampe di oedjoeng djalanan jang bermoela waktoe maoe dateng ka ini tempat. Di sitoe poen ada soenji, maka sambil berdjalan pelahan-pelahan, Bok Tjoen berkata:
„Ka mana sekarang kita pergi?"
„Balik sadja doeloe ka roemanja akoe poenja langganan," saoetnja Tjio Keng.
„Siapa kaoe poenja langganan ?"
„Saorang baek."
Kamoedian Tjio Keng tjeritaken bagimana itoe langganan telah toeloeng kasi tempat menginep dan dahar, djoega waktoe berlaloe dari roemanja ia telah dibekelin ongkos. Tapi sekarang, lantaran ini oewang jang dirampas oleh si toekang praoe soeda dapet kombali, baek balik sadja ka itoe roema.
Bok Tjoen toeroet sadja, maka tida lama Kamoedian ia sampe di itoe roema, sedeng orang ang poenja roema, satelah liat Tjio Keng balik kombali bersama-sama satoe temen, lantas samboet kadatengannja dan tanjaken ini itoe.
Kamoedian toean roema jang baek itoe lantas sadiaken makanan, dimana Tjio Keng bersama kawannja laloe makan sama-sama.
Sembari dahar Bok Tjoen berkata: apa itoe pakerdjahan jang baroesan dilakoeken boekan ada soeatoe pakerdjahan jang menggoembiraken ― Tjio Keng djawab, bener amat menggirangken. Kerna salaen bisa dapetken kombali milik jang dirampas orang, djoega telah binasaken itoe djahanam Liok Siang, hingga hatinja merasa poewas betoel.
„Tapi ini semoea ada Hengte poenja tenaga, kata Tjio Keng: kerna kaloe tida ada kaoe, masatah perkara jang begini gelap, bisa mendjadi terang?“
„Ah, itoelah tjoema kabetoelan sadja,“ saoetnja Bok Tjoen.
„Tapi apa jang klta lakoeken baroesan, djadi ada bergoena djoega bagi orang banjak, boekan? Sebab kaloe itoe djahanam tida dibinasaken, brangkali besok atawa noesa ia aken berboeat poela laen-laen kadjahatan jang samatjem itoe.“
„Itoelah soeda tentoe. Dan sabelonnja ia berboeat djahat pada kaoe, sataoe soeda brapa banjak orang jang dianiaja djiwanja, itoelah tida kataoean.“ Demikianlah doea sobat itoe beromong-omong sambil dahar.
Sasoeda itoe, Bok Tjoen kasi taoe, jang membikin ia djalan mengglandangan ka sana sini, lantaran di kampoengnja sendiri bada eroetang pada saorang jang bernama Jauw Hway, dalem itoe peroetangan sawanja dibikin djadi tanggoengan. Sabelon oetangnja dibajar loenas, ia tida bisa oesahken sawanja itoe.
Sekarang ia maoe minta Tjio Keng poenja pertoeloengan boeat doearatoes tail perak boeat meneboes itoe, jang di laen tempo kaloe ada oewangnja ia nanti bajar kombali doewitnja ini sobat.
Belon taoe apa ini kawan soeka menoeloeng atawa tida.
„Ah, kaloe Hengte ada kaperloean, djangan poela baroe doearatoes, kendali lebi poen kaoe boleh pake seperti oewang sendiri,“ kata Tjio Keng: „kerna ini oewang jang soeda terhilang, bila tida ada kaoe, masatah bisa dapet kombali.“
„Trima kasi,“ kata Bok Tjoen dengen hati terboeka.
„Boeat apatah dioetjapken itoe. Kerna kaloe maoe dianggap pertoeloengan, kaoe poenja pertoeloengan ada lebi besar sapoeloe kali. Dan kapantah itoe sawa maoe diteboes?“
„Akoe pikir besok„ kerna sekarang soeda sore Dan apa kaoe soeka ikoet djoega sama-sama kasana, boeat saksiken itoe peneboesan, soepaja Jauw Hway tida bisa moengkir lagi dari itoe pembajaran oewang?"
„Baeklah, dengen senang hati akoe toeroet."
Begitoelah iaorang beromong- omong dan lebi djaoe Bok Tjoen kata: kaloe sawanja itoe soeda diteboes, ia boleh tida oesah mengoembara ka sana sini, kerna soeda ada pakerdjahan jang boleh dilakoeken dengen tentoe aken mendapetken hasilnja satiap taon.
„Sabenernja, djangan poela baroe sabegitoe, kendati semoea kaloe kaoe ada perloe, akoe tentoe soeka sekali briken," kata poela Tjio Keng dengen soeara menghiboer: „ini oewang jang sekarang toch soeda teritoeng ilang. Maka brapa banjak djoega kaoe boleh pake seperti oewang sendiri, dengen troesa diboeat pikiran."
Malemnja dari itoe hari kombali Tjio Keng berdoea menginep di roemanja itoe langganan jang baek. Kerna sekarang soeda ada mempoenjai oewang, maka pembriannja itoe langganan ia bajar kombali dengen hatoerken djoega banjak trima kasi.
Toean roema jang liat Tjio Keng soeda bisa bajar kombali oewangnja dengen begitoe tjepet, laloe tanja: dari mana sobat ini dapet oewang.
Tjio Keng tida maoe tjeritaken barang jang sabetoelnja, hanja bilang sadja: waktoe kaloear dari sini ia telah katemoe sala satoe pioetang jang telah membajar, maka sekarang ia soeda ada kombali oewang.
Esoknja pagi, sasoeda membri slamat tinggal pada itoe langanan jang poenja roema, bersama-sama Bok Tjoen iaorang laloe berangkat ka Kengyangtin.
Tida lama marika itoe telah sampe.
Kerna itoe waktoe soeda sore, maka Jauw Hway jang denger kadatengannja Bok Tjoen, lantas boeroe-boeroe kaloear samboet, kerna ia doega: ini kali poelangnja Bok Tjoen tentoe ada membawa banjak oewang boeat bajar oetangnja. Maka ia berlakoe amat manis dan silaken doea tetamoe itoe masoek ka dalem
Bok Tjoen laloe kasi taoe maksoednja, bahoewa datengnja ini ada boeat memberesken itoe peroetangan jang doeloe.
„Oh, kaloe begitoe Siauw Long ada banjak oentoeng, tentoe!" kata itoe toean oewang dengen roepa girang: ja, soekoerlah!"
„Boekan, boekan lantaran dapet oentoeng sabagimana jang kaoe telah doega," saoet Bok Tjoen: „hanja kaloe sekarang akoe bisa teboes itoe, ada lantaran pertoeloengannja akoe poenja sobat ini."
Sambil kata begitoe, Bok Tjoen menoendjoek pada Tjio Keng jang ia kata: oewang itoe boleh dapet pindjem dari ini sobat.
„Baeklah, baeklah," kata Jauw Hway: tapi sebab sekarang hari telah moelai malem, maka itee oeroesan baek kita lakoeken sadja di hari esok. Bagimana, apa kaoe moefakat, Siauw Long?"
„Begoetoe poen baek," Saoet Bok Tjoen.
„Sekarang kaoe berdoea menginep sadja sama-sama di sini."
„Begitoe poen baek, malah akoe hatoerken djoega trima kasi."
„Ah, itoe perkara ketji sadja," kata Jauw Hway sambil berlaloe dan pesen orangnja soeroe sediaken makanan beserta arak jang baek, kerna ia pikir: sekarang ia bisa dapetken lagi oewang dengen djalan tida halal. Kerna Jauw Hway poen memang ada manoesia boeroek, jang amat soeka sama oewang.
Tida lama orangnja jang diprenta, telah sadiaken makanan dan Bok Tjoen bersama Tjio Keng dioendang makan minoem.
Sasoedanja minoem ampir sinting Jauw Hway itoe berkata:
„Boeat liwatken tempo jang menganggoer, apa tida baek kaloe ini malem kita-orang doedoek-doedoek maen, Siauw Long?"
„Apa. maen?" tanja Bok Tjoen dengen hati tergerak, kerna ia poen memang soeka sekali sama djoedi. Itoe perkara menggade sawa poen sabenernja ada dari lantaran maentop poenja gara-gara.
„Ja, kita-orang maen, soepaja tida djadi iseng," kata poela itoe toean roema sambil bersenjoem.
„Lebi baek kita omong-omong sadja," kata Tjio Keng: „boeat apatah maen, jang kalee kala bisa terbitken koerang enak hati."
„Oh, tida! Akoe tida begitoe!" kata Janw Hway: „Siauw Long kenal betoel adatkoe"
„Ja, kaoe orang baek," kata Bok Tjoen dengen soeara menjindir, tapi orang jang di sindiri tida merasa.
„Tapi sabenernja akoe senang sekali trima kaoe poenja oendangan," kata poela Bok Tjoen:
„kerna perkara maen, memang ada djadi kasoekahankoe. Tapi dengen teroes terang akoe maoe bilang, bahoewa oewangkoe tida ada. Dan itoe doearatoes roepia jang baroesan akoe serahken padamoe boeat meneboes sawa dengen sakalian milikkoe, ada dari pertoeloengannja ini sobat.
„Kaloe tjoema begitoe sadja, itoelah perkara ketjil," kata Jauw Hway sambil tertawa: „kitaorang maen sadja, sasoedanja brenti baroe itoeng siapa jang menang atawa kala, dan di sitoe baroelah jang kala membajar dan jang menang trima kamenangannja." Lebi djaoe Jauw Hway kata: kaloe Bok Tjoen kala, itoe milik-milik jang tadi diteboes, djadi kombali kapoenjahannja Jauw Hway, djadi seperti barang jang belon diteboes. Tapi kaloe Bok Tjoen jang menang, boekan sadja itoe milik dikasiken padanja, malah itoe oewang jang tadi poen ia nanti poelangken lagi.
Bok Tjoen jang memang soeda sinting laloe toeroet itoe adjakan, sedeng Tjio Keng maoe menjega, tapi koeatir sobatnja ini nanti merasa koerang senang, djadi antepi sadja, sambi awasi dari blakang kartoe-kartoe jang itoe sobat pegang.
Begitoelah permaenan lantas dimoelai, dan sadari doedoek, Bok Tjoen jang dapet kamoedjoeran, hingga Jauw Hway soeda kala bnnjok djoega.
Itoe waktoe hari telah djadi malem.
„Ah, soeda malem, baek kita brenti sadja," kata Bok Tjoen: lagi kaoe ini malem tida begitoe moedjoer, maka baek brenti sadja, sabelonnja djadi kala-banjak."
„Tida kenapa, tida kenapa, hajoe maen teroes," kata Jauw Hway, jang sekarang djadi terlebi panas dan tida maoe dibrentiken permaenannja,
Bok Tjoen toeroet sadja kahendaknja itoe toean roema. Tapi ini kali Jauw Hway tida maen dengen sadjoedjoernja, hanja kapandeannja dalem menimpa kartoe dan mengotjok, semoea dikaloearken, hingga saban-saban kartoenja sampe dengen banjak mata.
Begitoelah dengen akalnja itoe, dalem sedikit tempo kakalahannja telah poelang kombali Dan sasoedanja maen lebi djaoe, peritoengan di bidji soeiphoa ada ternjata di fihaknja Jauw Hway jang dapet kamenangan.
Bok Tjoen soeda kala kira-kira saratoes tail perak.
Pada waktoe fadjar kakalahan itoe soeda djadi doearatoes roepia, maka Jauw Hway lantas taro kartoenja dan kata: sekarang soeda ampir pagi, maka baek brenti sadja
Tentoe sadja Bok Tjoen tida maoe mengarti dan hendak maen teroes Tapi Jauw Hway sambil tertawa berkata:
„Maen teroes si boleh, kendati sampe besok djoega, masa akoe tida ladenin. Tapi kaoe moesti taoe, Siauw Long, bahoewa kakalahanmoe soeda, ada doearatoes tail tjoekoep, maka soeda abis pokohmoe jang diboeat bertaro. Dan kaloe kaoe masi ada poenja oewang, tarolah oewang itoe, soepaja kaloe kaoe kala lagi, kaoe bisa bajar akoe poenja oewang kamenangan."
„Apa? Oh, kaoe menghinaken sekali padakoe,ja?" kata Bok Tjoen dengen roepa goesar: „sedeng waktoe kaoe soeda kala, akoe maoe brenti, kaoe tida maoe kasi. Dan sekarang sasoeda kamenangan ada di fihakmoe, kaoe maoe brenti dan akalin oewangkoe."
„Apa kaoe bilang? Akoe maoe akalin oewangmoe? Ho, djangan kaoe kata begitoe. Kabe moesti pikir, seande akoe jang kala teroes-teroesan, akoe masi bisa bajar, kendati brapa besar djoega. Maka pantaslah akoe adjaki maen lebi djaoe. Tapi kaoe sekarang soeda tida poenja lagi oewang, mana akoe maoe lawan?"
„Tida! Kaoe moesti maen kombali!"
„Djangan kaoe berkeras-kerasan jang tida bergoena, Siauw Long! Sekarang Song Kang soeda tida ada di doenia, pada siapa kaoe boleh andelin pengaroenja dan keangkerannja. Kaoe begitoe brani memaksa pada akoe. Tida! akoe tida maoe!"
Mendenger ini perkatahan jang paling blakang, membikin Bok Tjoen dan Tjio Keng djoega djadi amat mendongkol. Tjoba kaloe jang berkata begini boekannja toean roema, tentoe marika soeda angkat tangannja boeat menampar.
Tapi itoe doea orang masi tahan sabar dan tanja lagi padanja: apa maoe maen kombali atawa tida.
„Tida! Akoe tida maoe," kata Jauw Hway dengen sengit, jang kombali seboet? namanja Song Kongbeng, dikataken ada djadi kawannja Bok Tjoen tapi sekarang itoe kapala brandal soeda tida mempoenjai pengaroe begitoe besar, dimana Bok Tjoen boleh goenaken namanja boeat membikin orang djadi takoet.
Ini perkatahan jang dioetjapken, maksoednja memang maoe bikin itoe doea tetamoe djadi mendongkol dan lantas berlaloe. Tapi maksoed itoe laen djalannja, kerna Bok Tjoen jang ditjatji begitoe roepa, kadoea koepingnja merasa panas dan dengen hilap tondjok moekanja itoe toean roema hingga moeloetnja djadi berboran dara.
„Koerang adjar, binatang!" kata Bok Tjoen sambil mendjotos, dan itoe poekoelan jang keras, sakali sadja membikin moekanja djadi petja.
Jauw Hway bertreak kasakitan, kamoedian mendjerit minta toeloeng.
Tapi Bok Tjoen belen merasa poewas kaloe tjoema hantem begitoe sadja. dengen kakinja ia menendang, sampe Jauw Hway djato di lantei.
Itoe waktoe orang-orang jang lagi tidoer djadi amat kaget denger soearanja ia poenja toean. Maka masing-masing laloe bangoen sambil membawa sendjata, kerna kira ada pentjoeri atawa perampok.
Jauw Hway jang soeda bangoen lantas madjoe memoekoel, kerna ia poen pande djoega sedikit silat.
Tapi Tjio Keng jang ada di sitoe, tentoe sadja tida maoe tinggal diam. Bermoela ia niat pisaken dan damikan sadja itoe perselisihan, tapi sebab hati sendiri poen djadi panas lantaran denger namanja Song Kong-beng jang telah meninggal diseboet-seboet, maka boekan sadja tida maoe pisaken, hanja bantoe djoega kawannja.
Begitoelah waktoe liat Jauw Hway menjerang sobatnja, Tjio Keng dengen kasebetan loear biasa laloe ketok tangannja itoe toean roema, kamoedian Bok Tjoen sembat satoe bangkoe dengen apa ia hantem kapalanja itoe doerdjana, hingga moentjrat otaknja.
Orang-orangnja Jauw Hway jang mana deket tentoe kena dilabrak, kerna itoe doea Hohan teramat kosen dan tida ada satoe orang jang bisa deketken. Kamoedian marika itoe pada lari, dengen tinggalken Tjio Keng bersama Bok Tjoen di dalem itoe roema.
Ini doea sobat jang soeda ilang poesingnja dan liat maitnja Jauw Hway ada menggeletak, di tana, Bok Tjoen laloe berkata:
„Apa jang kita lakoeken ini, boekannja perkara ketjil, kaloe sampe kataoean oleh politie kampoeng. Maka sekarang, sasoeda ketelandjoeran berboeat perkara besar, hajoelah kita lakoeken teroes, djangan kapalang tanggoeng.“
„Hengte hendak berboeat apa lagi?“ tanja Tjio Keng jang belen djoega mengarti maksoednja itoe sobat,
„Jauw Hway soeda binasa, sekarang marilah kita menggeraktak ka kamarnja, aken ambil kombali kita poenja oewang jang doearatoes roepia.“
„Itoelah tida lebi dari pantes.“
Kadoeanja itoe lantas masoek ka dalam, dimana tida ada kaliatan satoe manoesia. Istrinja Jauw Hway, jang roepa-roepanja soeda dikasi kabar pada orang-orangnja, bahoewa soeaminja telah binasa, lantas merat dengen ambil djalan dari pintoe blakang.
Sasampenja di dalem Bok Tjoen laloe liat-liat jang mana kamarnja itoe toekang lepas renten, dan sasoedanja kenalin betoel, kadoeanja itoe laloe boeka peti, dimana ada berisi oewang dan laen-laen barang berharga.
„Satoe kantong jang berisi doearatoes tail perak, djoega masi ada tersimpen di itoe tempat, maka Bok Tjoen lantas kaloearken sarajah berkata:
„Itoe djahanam maoe serakain kita poenja oewang, tapi sabelonnja bisa telen ini kantong doewit, djiwanja telah binasa.“
„Dia sendiri poen ada banjak mempoenjai harta," kata Tjio Keng sambil angkat itoe barang-barang mas dari dalem peti ka tempat tidoer.
„Hajoe kita ambil semoea boengkoes djadi satoe," kata Bok Tjoen.
Tjio Keng toeroet bitjaranja itoe sobat, ia ambil salembar kaen-kaen jang besar djoega, kamoedian taro itoe semoea kantong oewang dan barang perhiasan kapoenjahannja Jauw Hway, jang sasoeda itoe lantas diboengkoes djadi satoe, sedeng Bok Tjoen djoega boengkoes laen barang berharga djadi sagembolan.
Kamoedian marika bawa boengkoesan itoe. Sasampenja di loear masi djoega tida dikatemoeken orang, maka kadoea sobat itoe laloe berdami boeat bakar sadja ini roema, kamoedian baroe berangkat djalan
„Ja, begitoe ada baek," kata Tjio Keng jang njataken moefakat.
Sigra djoega sagala barang dan roempoet-roempoet kering ditoempoek djadi satoe di roewang pertengahan, kamoedian ditoewangken minjak, jang sasoeda itoe lantas disoeloet dengen api. Tida lama kamoedian itoe roema lantas terbakar.
„Biarlah akoe poenja sawa dan roema jang tergade tida kateboes, kerna ini barang dan barang perhiasan soeda tjoekoep boeat djadi gantinja," kata Bok Tjoen sambil mengawasi itoe api jang berkobar-kobar, dalem mana ada maitnja Jauw Hway jang tida diangkat doeloe kaloear.
„Itoe djahanam sendiri jang tjari mampoes," kata Tjio Keng.
Kamoedian kadoeanja itoe laloe berangkat dari itoe tempat dan berdjalan dengen tjepet ka roemanja itoe langganan, dimana barang-barangnja ada dikirim.
Di sapandjang djalan Bok Tjoen dan Tjio Keng mengomong tida brentinja. Satoe pada laen menjataken senangnja hati sasoeda lakoeken itoe perboeatan jang membales sakit hatinja.
Sasoedanja berdjalan djaoe djoega, marika itoe menengok ka blakang, dan, di atas oedara ada kaliatan sinar terang dari sinarnja api jang menjala,
„Baek begitoe," kata Bok Tjoen sambil bersenjoem:,,pada waktoe orang politie dateng, marika tida nanti dapetken tanda apa-apa jang menjataken itoe kariboetan atawa pemboenoehan."
„Tapi dari orang-orangnja Jauw Hway jang telah merat, tentoe politie bisa dapetken djoega katerangan," kata Tjio keng.
„Ah, itoelah perkara ketjil," saoetnja itoe sobat, jang sedikit poen roepanja tida merasa takoet.
Tatkala itoe boelan ampir silem. Djalanan soeda moelai terang dan marika itoe berdjalan dengen tjepet, jang tida lama soeda kaloear dari itoe kampoeng Kengyangtin.
Dengen itoe djalanan tempat dimana waktoe marika dateng, sekarang iaorang liwatken poela boeat dateng ka roemanja itoe langganan, jang sabelonnja tengahari telah sampe dan sigra djoega iaorang masoek
„Hola, kaoe soeda balik kombali," kata itoe langganannja Tjio Keng sambil tertawa: Dengen membawa djoega banjak barang-barang."
„Ja," kata Tjio Keng sambil memanggoet.
„Apa itoe semoea oeroesanmoe telah beres,"
„Oh, beres betoel."
„Soekoerlah, kaoe bisa bekerdja dengen tjepet, sobat."
„Ja, sebab berdoea, sagala pakerdjahan bisa dilakoeken lebi tjepet dari sendiri."
Kamoedian orang jang poenja roema prenta istrinja tjariken nasi boeat Tjio Keng berdoea sobatnja. Dan sambil santap Tjio Keng kasi taoe lantaran ada laen oeroesan lagi jang belon dikerdjaken, maka ini hati djoega ia maoe berangkat, dan datengnja ka mari ada boeat ambil barang-barangnja jang dikirim.
Toean roema laloe kaloearken itoe barang, sedeng Tjio Keng laloe kasiken satoe-doea roepa barang mas jang dapet dirampas dari roemanja Jauw Hway, sabagi tanda mata dari marika poenja persobatan.
„Kaoe ini orang baek soenggoe, sobatkoe," kata Tjio Keng: „maka trimalah ini barang sabagi peringetan tanda dari akoe, jang sataoe kapan baroe kita-orang bertemoe kombali."
„He, kamanatah kaoe maoe pergi ?“ tanja itoe toean roema.
„Akoe maoe pergi ka laen tempat.“
„Boeat berdagang?“
„Brangkali berdagang atawa boekan, tapi katjintahanmoe akoe tida loepaken, sobat.“
Sahabisnja beromong-omong doea Hohan itoe membri slamat tinggal dan lantas berlaloe.
Tida lama kadoeanja itoe soeda berdjalan djaoe, masing-masing ada menggendong boengkoesan oewang dan barang, dengen tida kataoean kamana jang maoe dipergiken.
„Ka mana sekarang kita pergi?“ tanja Bok Tjoen pada sobatnja.
„Ka mana, itoelah akoe sendiri tida taoe,“ saoetnja.
Bok Tjoen berdiam dan berdjalan teroes dengen hati berpikir.
Tapi sabelonnja itoe sobat berkata apa-apa, Tjio Keng soeda dapet inget dan kata, ia telah dapet satoe pikiran jang tentoe, satoe tempat jang dirasa ada sampe baek boeat toempangken diri.