Pembalesannja Kawanan Liangsan/Bagian kadoea/Bab 8
VIII
Teng Tjoe-pian berboeat satjara
amat terkeboer. Membikin pem-
balesan tipoenja diatoer.
Sabelon maksoednja Lie Tjhoen itoe moelai kaliatan, baek sekarang kita menilik ka laen fihak, di mana itoe semoea tjerita-tjerita jang di atas nanti berhoeboeng.
Di tepi dari itoe telaga Thayouw bagian sebla Oetara, jang termasoek dalem daerah kota Siangtjioe, ada terdapet satoe doesoen jang terletak di lemba goenoeng, dan sala satoe pendoedoeknja jang paling hartawan ada bernama Teng Tjoe-pian, jang orang banjak kasi nama sabagi alias: Pahsantjoa.
Doeloe ini orang hartawan soeda pernah pangkoe djabatan sabagi ambtenaar dalem bilangan Hokkian. Peranginja amat boeroek, soeka sekali trima soewaban dari pendoedoek negri jang ada mempoenjai oeroesan apa-apa. Dan kaloe orang jang tersangkoet perkara loepa membri smeer, perkaranja tentoe djadi laen dari sabagimana adanja.
Kerna Teng Tjoe-pian ada mendjadi sala satoe moeridnja dorna Tjoa Keng, maka dalem djaba djabatannja itoe ia bisa djoega dapetken pengaroe. Dan lantaran begitoe, maka namanja amat ditakoe, kerna orang banjak poen sampe taoe, bagimana besar kaloe orang-orang jang mendjadi moeridnja itoe dorna.
Kampoeng di mana Teng Tjoe-pian bertempat, adanja di deket goenoeng Matjeksan, di bawa penilikannja satoe pembesar dalem kota Siang jioe, jang berpangkat Thaysioe dan bernama Lu Tji-kioe. Ini orang jang terseboet blakangan poen ada berkwaliteit sabagi Tjoe-pian sendiri, dan lantaran itoe maka tida heran kaloe kadoeanja itoe ada bersobat baek satoe pada laen:
Saban taon atawa satoe taon doea-tiga kali, ini orang hartawan tida loepa kirim anteran pada Lu Tji-kioe, hingga itoe Thaysioe jang djoega amat rakoes, djadi girang dan maski orangnja djaoe, tapi persobatannja djadi samingkin kekal.
Teng Tjoe-pian berboeat begini boekan persadja, hanja ia maoe pindjem pengaroenja itoe Thay sioe.
Begitoelah hal ini telah terdjadi, maka di itoe tempat ia laloe adaken saroepa atoeran di telaga dari wates goenoeng Tayloeisan sebla Oetara ada mendjadi ia poenja hak, laen orang, maski pendoedoek di sitoenja sekali poen, dilarang menangkep ikan kaloe dengen zonder idjinnja. Sabaliknja, bila si penangkep-penangkep ikan soeda dapet perkenan, baroe boleh ia tangkep itoe, tapi pendapetanja mesti dikasiken padanja saparo.
Satiap hari di itoe telaga ada ditaro orang djaga-djaga jang saban-saban mengider di sakiternja rawa, boeat liat-liat praoe ikan jang tida pake pertandahan soeda dapet itoe perkenan. Dan bila kadapetan ada praoe jang masoek kasitoe dengen zonder memake tanda idjin, orang-orang djaga itoe lantas tangkep, roesakin ia poenja djala dan lajar, sedeng penangkep ikannja diserahken pada Lu Thaysioe boeat dihoekoem. Sedeng itoe Thaysioe, jang memang ada djadi sobat kerasnja Teng Tjoe-pian, dengen tida paeksa lagi laloe djatoken hoekoeman menoeroet sabagimana soerat jang itoe bekas ambtenaar kirim padanja.
Lantaran ini; tida ada orang jang brani tangkep ikan dengen zonder minta idjin lebi doeloe. Ini atoeran jang ditetepken menoeroet samaoe-maoenja, tentoe sadja ada mendatengken rasa.
Tida senang di hatinja sakalian pendoedoek. itoe tempat, jang memang biasa mentjari ikan boeat pengidoepan sahari-hari. Tapi itoe rasa tida senang tinggal terkandoeng sadja dalem hati, kerna marika tida bisa berboeat apa-apa.
Maoe tjoba memaksa boeat langgar itoe atoeran, marika tentoe terhoekoem, sebab kaloe dibawa mengadep sadja pada Lu Thaysioe, soeda tida ada ampoennja lagi. Sabaliknja kaloe moesti toeroet itoe atoeran, ada dirasaken kaliwat berat, sebab saparo dari pendapetannja moesti dibagiken.
Sakean Isma itoe toeran berlakoe, tida ada orang jang brani langgar.
Achir-achir ini atoeran jang tida patoet, dapet djoega didenger oleh Lie Tjhoen, jang satelah dapet itoe kabar, djadi amat tida senang. Betoel Lie Tjhoen poenja praoe-praoe ikan belon ada jang dateng menangkep sampe ka itoe tempat, tapi toch ada menjoesaken pada orang banjak jang biasa melakoeken itoe pakerdjahan.
Kamoedian ini Twako prenta orangnja pergi ka itoe tempat boeat tjari taoe, apa betoel ada begitoe roepa. Tida lama orang itoe soeda kombali dan kasi taoe, bener sabagimana adanja itoe kabar.
Mendenger itoe katerangan Lie Tjhoen djadi amat moerka dan berkata pada soedara-soedaranja:
„Perboeatannja itoe djahanam Teng Tjoe-pian tida boleh diantep begitoe sadja, kerna dengen berboeat demikian, ada tida bedah sabagi hendak menjekek pendoedoek jang lemah. Kita moesti toeloeng itoe orang-orang ketjil jang tida berdaja, soepaja marika boleh terlepas dengen itoe atoeran gila-gila jang bersifat kedjem.“
„Bagimana Hiante poenja pikiran?“ menanja ia pada itoe soedara-soedara.
„Sasoenggoenja djoega itoe perboeatan tida boleh diantepin, saoet Hoei Po: „maka boeat toeloeng orang banjak, baek kita pergi ka sana dan bikin roesak ia poenja atoeran, atawa kita satroeken padanja.”
„Bener! hajoelah kita-orang pergi ka sana, Twa-ko!„ berseroeh Tong Beng sambil bangkit dari tempatnja doedoek dengen roepa goesar: „boeat apa bikin banjak-banjak soesa boeat roesakin itoe atoeran, hanja paling baek kita paranin dan bikin remoek ia poenja batok kapala, dengen begitoe, sakali sadja lantas beres.”
„Itoelah ada djalan jang paling baek dan gampang,” berseroeh jang laen-laen, djoega dengen roepa goesar.
Begitoelah, dengen tida oesah banjak bitjara boeat damikian ini oeroesan, itoe toedjoe orang gaga lantas berbangkit dari tempatnja berhimpoen dan laloe toeroen ka dalem satoe praoe jang memang telah disadiaken, dan lantas prenta anak praoe djalanken menoedjoe ka goenoeng Taylioesan.
Praoe ini ada besar, jang dipasangin lajar besar dan dilengkapi dengen berbagi-bagi sendjata, betoel seperti orang jang hendak bertaroeng pada moesoe.
Kerna angin itoe waktoe ada bagoes, maka tida lama kamoedian praoenja Lie Tjhoe telah sampe di itoe telaga dan lantas masoek ka wates jang dilarang.
Itoe waktoe di sakiternja telaga ada banjak praoe-praoe ketjil jang didoedoeki orang djaga-djaga. Satelah praoe pengawal itoe liat, jang satoe praoe besar, dengen zonder memake bendera perkenan, soeda masoek ka dalem wates jang dilarang, sigra djoega itoe banjak praoelaloe dateng memboeroe, mengandang di depan praoenja Lie Tjhoen sambil bertreak sakeras-kerasnja:
„Tahan! Praoe dari mana itoe?!“
Kamoedian dari laen-laen praoe poen kadengeran soeara treakan jang dikaloearken dengen bengis dan keren, kerna itoe orang-orang pengawal, dengen mengandel pengaroenja Teng Tjoepian, djadi amat sombong.
„He pendjahat, kaoe begitoe koerang adjar brani masoek ka mari!“ treak itoe orang-orang djaga sambil angkat tangan, dan ada djoega jang angkat toengket dan sambil memaki teroes:
„Apa kaoe poenja mata boeta, koeping toeli, hingga tida taoe tempat apa adanja di sini dan brani masoek sembarang-barang?!“
„He, kawanan andjing!“ membentak Hoei Po, jang itoe waktoe soeda berdiri di kapala praoe sambil menoeding: „akoe dateng ka mari boekannja maoe tangkep ikan, hanja maoe tangkep oeler Pahsantjoa, jang soeda mengganggoe pengidoepannja orang ketjil. Akoe maoe keset dia poenja koelit, boeat membikin poewas hatinja orang banjak!“ Itoe orang djaga-djaganja Teng Tjoe-pian belon kenal siapa adanja Hoei Po, maka satelah denger itoe perkatahan, marika djadi goesar dan lantan kasi pertandahan soepaja praoe-praoe jang laes lekas madjoe.
Begitoelah dalem sedikit tempo, bilang poeloe praoe ketjil soeda ada di hampirnja Lie Tjhoen poenja praoe, sambil mendesak marika goenaken roepa-roepa sendjata, seperti gaetan, tjagak dan sabaginja boeat menggaet orang poenja lajar aken dibikin roesak.
Tapi sabelonnja orang poenja lajar dapet diroesaki, itoe toedjoe orang gaga soeda bersiap dan kasi labrakan satoe persatoe pada siapa jang brani deket. Djoega kerasnja angin di itoe waktoe, membikin itoe praoe jang memake lajar djadi lebi ladjoe dan bentoer sasoeatoe praoe ketjil jang berhampiran padanja, hingga banjak jang pada kleboe dan orangnja katjeboer.
Sasoedanja meroesaki tiga boea praoe dan kasi labrakan pada itoe orang-orang, Lie Tjhoen prenta moendoerin poela praoenja dan balik poelang. Dan prenta ini ditoeroet, jang sebentaran sadja itoe praoe lajar soeda kaliatan djaoe.
Orang-orangnja Teng Tjoepian tida ada jang brani mengedjer lagi, hanja mengawasi sadja dengen bengong, sedeng sabagian membri pertoeloengan pada kawan-kawannja jang pada djoempalitan di aer.
Sasoedanja berada kombali dalem praoenja, itoe pengawal laloe naek ka darat dan lantas mengadep pada Teng Tjoe-pian, aken lapoerken dari hal jang baroesan terdjadi di itoe telaga.
Mendenger ini warta, itoe Pahsantjoa djadi terkedjoet jang tertjampoer goesar. Kagetnja, kerna dalem sabegitoe lama belon pernah ada orang jang brani langgar larangannja, dan heran sekali, siapa orang jang sekarang begitoe koerang adjar brani bikin maen gila ia poenja atoeran.
Goesarnja, sebab itoe praoe lajar soeda liat tida mata padanja, saorang jang berpengaroe dan ditakoetin.
„Begitoe? Begitoe koerang adjar?“ kata Teng Tjoe-pian dengen mata melotot: „siapatah adanja itoeorang-orang?“
„Menoeroet sapandjang katerangan jang didapet,“ saoet itoe orang djaga-djaga: „praoe itoe ada dikapalaken oleh Lie Tjhoen dan Hoei Po, jang sengadja dateng ka itoe telaga melanggar atoeran jang telah ditetepken.“
„Siapa, Lie Tjhoen?“
„Benerlah dia, Loya.“
„Oh, itoe bangsat kawanan penjamoen Liang-san!“ treak Teng Tjoe-pian dengen soeara keras: „njatalah ia itoe ada koerang adjar sekali, begitoe brani langgar akoe peenja atoeran.“
„Tapi, Loya, boekan tjoema begitoe sadja,“ kata itoe orang djaga-djaga, jang tadi telah denger apa Hoei Po berkata: „hanja ia apa berkata djoega apa-apa jang tida enak boeat Loya poenja diri.“
„Apatah ia bilang?“ tanja Teng Tjoe-pian dengen lakoe tida sabar.
„Ia kata, datengnja ka itoe telaga ada dengen sengadja. Ia maoe tjari pada Loya boeat dikeset koelitnja.“
„Begitoe dia bilang itoe bangsat?!“ treak Teng Tjoe-pian dengen soeara terlebi keras: „begitoe Lie Tjhoen bilang, dia maoe keset akoe poenja koelit?“
„Boekan Lie Tjhoen, tapi Hoei Po jang kata begitoe.“
„Ah, koerang adjar! Koerang adjar seriboe kali, itoe kawanan penjamoen Liangsan jang tida taoe adat!“ kata Teng Tjoe-pian dengen soeara gergetan, sambil banting-banting kaki. Kamoedian sambil moendar mandir kadengeran ia memaki-maki tida soedanja.
„Hm! hm! itoe Lie Tjhoen, Lie Tjhoen kapala brandal dari kawanan Liangsan!“ kata poela Pahsantjoa dengen soeara menggerang: „kaoe belon taoe akoe poenja pengaroe, bangsat! Kaoe liat! Liatlah bagimana akoe nanti bikin pada dirimoe.“
„Boeat itoe bangsat-bangsat jang begitoe roepa, tida perloe akoe goenaken tenaganja orang-orangkoe,“ kata Pahsantjoa sambil manggoet-mangoet: „dengen sapoetjoek soerat, tjoekoep aken bikin itoe kawanan penjamoen masoek dalem boei.“
Sahabisnja kata begitoe, ia lantas masoek ka dalem dan menoelis satoe soerat pada Lu Tji-kioe, jang boenjinja, membri taoe, bahoewa kawanan penjamoen Liangsan salaloe mengganggoe prikeamanan tempat-tempat. Dan sekarang ada bebrapa orang jang dikapalaken oleh Lie Tjhoen soeda berboeat roepa-roepa perkara jang melanggar atoeran, hingga kaloe tida lekas ditangkep, pasti bisa menerbitken kaonaran besar.
Maka satrimanja ini soerat, ia harep Lu Thay-sioe lekas commendir sadjoembla balatantara boeat pergi ka Siauwhewan, aken tangkep Lie Tjhoen dengen kawan-kawannja
Kamoedian ia prenta satoe orang pergi ka kota Siangtjioe. aken sampeken soerat ini pada Lu Tji-kioe.
Itoe pembesar, satelah sasoedanja membatja boenjinja itoe soerat, dengen zonder pikir dan tjari taoe lebi djaoe, laloe prenta satoe ambtenaar militair jang bekerdja di bawa prentanja siapken tigaratoes soldadoe boeat bikin pengerojokan. Tapi sabelonnja orang militair itoe bersiap, satoe penggawe jang bekerdja di bawa prentanja, lantas menanja:
„Bolehtah akoe dapet taoe, Loya siapken soldadoe aken goena apa?”
„Boeat tangkep Lie Tjhoen, itoe brandal jang doeloe dari kawanan Liangsan,” saoet Lu Thaysioe.
„Lie Tjhoen?” kata itoe penggawe: „ia toch tinggal di Siauwhewan, boekan?”
Bener. Dan ini soldadoe poen akoe siapken boeat pergi ka sana.
„Kaloe begitoe, boeat apa Loya siapken sendiri, sebab Siauwhewan toch boekan termasoek dalem bilangan kota Siangtjioe, hanja ada termasoek dalem daerah Souwtjioe. Maka lebi baek Loya toelis sadja satoe soerat dan kirim pada pembesar di sana, soepaja Thaysioe di Souwtjioe jang kasi adjaran padanja.”
Lu Thaysioe berdiam sabentaran, dan ia rasa bitjaranja itoe penggawe ada bener. Maka sigra djoega ia laloe toelis satoe soerat dan prenta orang bawa pada pembesar di itoe tempat, sedeng prenta jang baroesan dikaloearken, laloe dioeroengken.
Tida lama kamoedian itoe soerat telah sampe di tangannja itoe pembesar, jang satelah trima, lantas boeka dan batja.
Maksoednja satoe persatoe ia mengarti terang. Tapi sebab pembesar ini ada saorang jang bidjaksana, berboedi dan berpikiran terang, maka tida gampang ia lantas toeroet kahendaknja itoe kawan sadjabat.
Djoega ia taoe, bahoewa Teng Tjoe-pian soeda lama kaloearken itoe atoeran sawenang-wenang dengen dapet bantoeannja Lu Tji-kioe, boeat kaoentoengannja sendiri.
Menoeroet sapandjang penjelidikan, perboeatannja Teng Tjoe-pian itoe ada sanget menjoesaken pada orang ketjil, teroetama jang melakoeken pentjariannja tangkep ikan. Djoega ini pembesar taoe, bahoewa Lu Tji-kioe soeda djatoken hoekoeman pada banjak orang, atas kahendaknja Tjoe-pian, dan lantaran ini, membikin itoe orang hartawan jang djahat, djadi bertamba kedjem.
Perboeatan begini, Thaysioe di Souwtjioe rasa tida boleh di tinggal diam. Soeda lama djoega ia niat kasi hadjaran pada Teng Tjoe-pian, tapi sabaliknja, lantaran inget: dalem ini perkara ia djadi moesti bersatroe djoega pada Lu Tji-kioe, jang ada mempoenjai senderan tegoe di kota Radja, ia djadi merasa koeatir tida nanti sanggoep tempoer, dan kaloe terdjadi begitoe, diri sendiri bebalik boleh djadi tjilaka.
Lantaran ini djoega, maka sakean lama ia antep sadja, sampe dateng satoe waktoe jang baek boeat bermoesoe pada itoe orang hartawan jang djahat dan ambtenaar jang tida melakoeken betoel kawadjipannja.
Kerna soeda taoe bagimana kadjahatannja itoe Pasantjoa, maka tentoe sadja permintahannja Lu Tji-kioe tida diladenin, hanja lantas soeroe itoe orang jang membawa soerat balik kombali ka Siangtjioe, sedeng dalem hati sendiri ada poedji atas Lie Tjhoen poenja kabranian.
„Apa jang dilakoeken oleh Lie Tjhoen dan kawan-kawannja, itoelah ada pantas sekali,” kata itoe Thaysioe dalem hati: „kaloe Lie Tjhoen soeda berboeat begitoe, njatalah itoe orang gaga maoe satroeken kadjahatannja Pahsantjoa, aken goena orang banjak. Dalem ini perkara, boekan sadja akoe tida nanti salaken, hanja kaloe bisa, akoe poen maoe membri bantoean soepaja kakerenanja Teng Tjoe-pian djadi poena.”
Tida lama kamoedian itoe pembawa soerat telah sampe ka kantoor pembesarnja, dan lantes kasi taoe pada Lu Tji-kioe, bahoewa pembesar di Souwtjioe roepa-roepanja tida begitoe perhatiken boenjinja itoe permitahan.
Satelah denger ini kabar, Lu Tji-kioe djadi amat mendongkol dan lantas prenta orangnja pergi oendang Teng Tjoe-pian dateng ka kota, boeat bitjaraken itoe oeroesan lebi djaoe dan atoer bagimana baeknja.
Esoknja Pahsantjoa jang dioendang lantas dateng ka kota, kadatengan mana ditrima dengen girang oleh ambtenaar jang berkwaliteit boeroek, jang lantas diadjak ka blakang boeat berdami.
„Harep Liangheng tida ketjil hati, kaloe itoe oeroesan sabegitoe lama akoe tinggal diam, boekan kerna akoe tida maoe oeroes,” kata Lu Tji-kioe pada sobatnja itoe: „hanja kerna menginget jang Lie Tjhoen poenja tempat kadiaman ada termasoek dalem daerah Souwtjioe, maka akoe soeda kirim soerat ka sana, soepaja Souwtjioe poenja pembesar lakoeken kawadjibannja. Tapi siapa taoe, kaloe permintahankoe dibikin kapiran.”
„Ja, itoelah ada alpanja pembesar di Souw-tjioe,” saoet Teng Tjoe-pian: „tapi sobatkoe tentoe tida tinggal diam, boekan?”
„Oh, tentoe,” saoet ini pembesar kaparat: „maski bagimana djoega akoe nanti berdaja, soepaja itoe Lie Tjhoen bersama kawan-kawannja jang soeda berlakoe koerang adjar dan tida mengindaken pada Lianheng, dapet rasaken boeanja ia poenja koerang adat.”
„Trima kasi atas Lokongtjouw poenja katjintahan, jang njata ada perhatiken betoel akoe poenja oeroesan.”
„Ah, itoelah soeda djamaknja boeat satoe sobat.”
„Tapi salaennja itoe, dengen mengoeroes akoe poenja perkara, Lokongtjouw djadi melakoeken djoega kawadjiban jang aseli. Kerna itoe Lie Tjhoen dan kawan-kawannja memang ada kawanan Liangsan jang haroes ditangkep.”
„Djoestroe lantaran itoe djoega, maka akoe oendang Lianheng ka mari boeat berdami lebi djaoe.”
„Dalem hal apatah?”
„Bagimana sekarang kita berboeat, soepaja bisa tangkep itoe Lie Tjhoen. Lianheng tentoe bisa pikir dan atoer.”
Teng Tjoe-pian berdiam, sambil toendoek ia tjari pikiran, daja bagimana haroes digoenaken, soepaja Lie Tjhoen dan kawan-kawannja gampang terdjebak. Sebab itoe orang gaga, boekan seperti laen-laen pendoedoek jang biasa, jang dengen siapken sedikit soldadoe bisa lantas katjekel. Padanja, tentoe orang moesti lakoeken satoe pertempoeran jang seroeh dan sengit.
„Sebab akoe taoe pasti, jang Lie Tjhoen itoe tentoe tida gampang-gampang maoe menjerah,” kata poela Lu Tji-kioe, pada sabelonnja itoe sobat menjaoet: „sebab boeat tangkep itoe kawanan bekas brandal, orang tentoe tida boleh goenaken atoeran biasa.”
„Bener,” kata Palisantjoa sambil menangoet.
„Sekarang akoe dapet satoe tipoe,” kata poela ia: „ini penangkepan kita moesti lakoeken di waktoe pesta Goansiauw.”
„Bagimana boleh begitoe?” „Begini: pada sabelonnja pesta itoe dateng, Lokongtjouw boleh kaloearken prenta, bahoewa ini taon Goansiauw aken dibiken terlebi rame dari jang soeda-soeda. Semoea pendoedoek Siangtjioe rata-rata diwadjibken rajahken itoe pesta, dan masing-masing pintoe moesti pasang penerangan teng roepa-roepa, tapi jang satoe ada berlaenan dari jang laen.”
„Kamoedian?”
„Ini pesta jang rama tentoe ada mendjadi soeatoe lantaran boeat Lie Tjhoen dan kawan-kawannja dateng ka mari. Sebab itoe orang-orang koerang adjar jang tida taoe adat, dan jang salaloe membawa kabranian sendiri, pasti aken dateng djoega toeroet merajahken pesta terseboet.”
„Tapi dengen alesan apa pendoedoek Siang-tjioe kita prenta rajahken pesta lebi rame dari taon-taon jang soeda?”
„Oh, itoelah gampang sekali, hanja dengen membri alesan, jang ini taon pendoedoek dapet banjak senang, kota Siangtjioe dapet kamahmoeran, maka pesta ini dirajahken sabagi tanda kagirangan.”
„Bener Lianheng poenja pikiran dalem sekali. Dan, sasoedanja begitoe?”
„Dengen tida banjak soesa kita bisa dapet tangkep, dengen toedoehan jang marika maoe bikin roesoeh di laen orang poenja bilangan. Dan penangkepan ini bisa dilakoeken dengen goenaken tenaganja sedikit orang militair soeda tjoekoep, sebab di itoe waktoe marika tentoe tida bersadia.“
Lu Tji-kioe, satoe Thaysioe kaparat jang tramempoenjai kamampoean satoe apa dalem oeroesan mengatoer tempat jang mendjadi pegangannja, satelah denger tipoe jang itoe manoesia boesoek toetoerken, lantes memoedji sambil memanggoet-manggoet, dan berdjangdji nanti toeroet apa jang telah ditetepken.
Teng Tjoe-pian djadi amat girang, waktoe meliat si sobat soeka toeroet ia poenja kahendak. Sasoedanja beromong-omong, Tji-kioe prenta orangnja sadiaken sedikit barang makanan boeat mengoendang ini sobat baek.
„Ah boeat apatah bikin soesa pada Lokongtjouw," Teng Tjoe-pian sambil menjega: „troesa, menjoesaken, sobatkoe.“
„Ah, soesa apatah djoega,“ saoetnja.
Tida lama barang makanan telah sadia dan doea orang itoe laloe doedoek makan minoem, sembari omong ka Timoer dan Barat.
Sahabisnja minoem-minoem Pahsantjoa itoe pamitaan poelang. Hatinja amat girang dan sasampenja di roema ia berkata pada orang-orangnja:
„Kaloe akoe belon masoeki itoe brandal kawanan Liangsan ka dalam pendjara, belon poewas akoe poenja hati. Perboeatan koerang adjar jang marika telah oendjoek, liatlah akoe kasi pembalesan jang merasa betoel."
Sekarang biarlah kita tinggalken Pahsantjoa, jang lagi sedeng kagirangan bakal bisa membales, sakit hati, hanja mari kita liat kombali pada Lie Tjhoen, pada waktoe sasoeda moendoerken praoenja dari itoe telaga.
,,Apa jang baroesan kita telali lakoeken," kata Lie Hoen pada soedara-soedaranja: ,,akoe kira tida bakal abis dengen begini sadja, sebab itoe Oeler Berbisa, jang ada menpoenjai senderan pada Lu Tji-kioe, tentoe tida senang jang orangnja kita labrak begitoe roepa:"
,,Bolelh djadi," saoet Tong Beng: ,,tapi perdoeli apa ia koerang senang, kerna kita poeti memang boekan mage bikin itoe djahanam dapet kagirangan."
,,Ah, betoelnja tadi sabelonnja berlaloe, kita moesti dateng djoega ka roemanja itoe Pahsantjoa," kata Tong Wie: „aken kasi bebrapa kepelan di moekanja, sebab kaloe tjoema melabrak sadja pada orang-orangnja, ia tentoe tida begitoe rasaken."
„Kaloe begitoe, apa tida baek kita balik kombali?" kata Tong Wie.
Bebrapa soedara ada jang maoe, ada djoégal jang kata boeat apa. Sedeng Lie Tjhoen laloe berkata: „Boeat kasi labrakan pada itoe Pahsantjoa, sekarang toch belon perloe, hanja apa jang kita lakoeken tadi, tjoema maoe kasi oendjoek padanja, bahoewa ia peenja atoerang ila-gila, boekan tida ada orang jang brani langgar. Nah, sekarang, sasoedanja kita kasi tjonto, sedikitnja ia poenja kakerenan djadi koerang djoega di matanja orang banjak.”
Hoei Po menjataken satoedjoe dengen bitjaranja itoe Twako, maka niat boeat balik kombali laloe dioeroengken.
Brapa hari telah berlaloe.
Dan sigra djoega dateng harian taon barbe, jang lantes disamboet oleh sakalian pendoedoek dengen kagirangan.
Lie Tjhoen dan satoeroe soedaranja poen rajahken itoe dengen senang hati, satiap hari ada dibikin pesta makan minoem.
Selang brapa hari kamoedian, ini toedjoe soedara dapet kabar, ini taon pesta Goansiauw di kota Siangtjioe bakal dirajahken dengen terlebi rame, sedari malem tanggal 13 sampe maleman tanggal 18 baroe pesta itoe brenti.
„Kaloe begitoe tentoe bakal djadi rame betoel,” kata Lie Tjhoen pada itoe orang jang sampeken tjerita padanja.
„Tentoe sekali,” saoet itoe orang: „djoega kabarnja Thaysioe di itoe kota ada wadjibken pada sasoeatoe pendoedoek dari itoe kota, bahoewa pada maleman pesta, sasoeatoe roema moesti pasang penerangan jang berlaenan satoe dari laen.“
„Apa kaoe taoe, sebab apa pesta ini diadaken dengen terlebi rame dari taon-taon jang laloe?“ tanja Lie Tjoen.
„Katanja sebab kota Siangtjioe ini taon ada mahmoer,“ saoetnja.
Lie Tjhoen tida menanjaken lagi, hanja ini kabar ia kasi taoe pada soedara-soedaranja dan tanja, apa itoe sakalian soedara ada pikir djoega maoe pergi menonton, kaloe pesta dirajahken.
„Oh, kaloe tjoema boeat pergi menonton, kita orang moesti pergi ka kota Siangtjioe, itoelah akoe tida satoedjoe,“ begitoe Ko Tjeng njataken pi kirannja: „belon taoe bagimana laen-laen soedara poenja pikiran.“
„Tapi lantaran apa?“ tanja Lie Tjhoen.
„Siapa boleh taoe, kaloe itoe karamean loear biasa diadaken sakedar boeat pikat pada kita,“ saoet itoe soedara, jang njata ada mempoenjai doegahan amat djitoe: „sebab, sabagimana Twako taoe, itoe Teng Tjoe-pian pada Lu Tji-kioe, satoe pada laen ada begitoe rapet seperti soedara, dan boleh djadi djoega, lantaran kita soeda labrak orang-orangnja itoe Oeler Berbisa, si oeler itoe djadi sakit hati dan lantas berdami pada sobatnja itoe, boeat djebak kita berame.“ „Hengtiang poenja doegahan ada terlaloe djaoe," kata sala satoe soedara sambil tertawa: „masalah boeat djebak kita, moesti diadaken itoè pesta, hahaha!”
„Eh, siapa boleh taoe?" kata poela Ko Tjeng, jang tetep dalem doegahannja: „apa poela itoe pesta diadaken dengen, sasoeatoe pendbedoeknja diwadjibken moesti, hiasken penerangan di masing-masing poenja depan roema. Apa tida boleh djadi, jang itoe karamean sengadja diatoer meloeloe boeat tarik kitą poenja hati?"
Tek Seng jang djoega ada di sitoe, menjataken tida bisa satoedjoe dengen, pikirannja ini soedara. Atawa sekali poen jang itoe Thaysioe dan Teng Tjoe-pian adaken pesta jang begitoe rame, sekedar boeat memikat iaorang, toeh saharoesnja, — begitoe Tek Seng kata lebi djaoe — tida perloe dikoeatirken.
„Tjobalah soedara-soedara pikir," kata poela ia sabagi penoetoepnja: „doeloe waktoe kita masi berampat, kita toch brani malang melintang dengen tida merasa koeatir pada siapa djoega. Tapi sekarang, sasoedanja kita poenja soedara-soedara djoemblanja ada bertoedjoe, masa moesti djadi penakoet?"
Bebrapa antaranja ada menjataken satoedjoe dengen bitjaranja ini soedara jang aseran, hingga Ko Tjeng djadi berdiam sadja. “Pendeknja, sabagi satoe laki-laki, kita tida takoet boeat dateng di Siangtjioe”, kata poela Tek Se ig itoe: „laen dari begitoe, dalem iloe kota toch ada banjak sekali penonton, jang seande bener kita maoe dipikat, apatah, tentoe marika nanti bisa kenalken pada kita sakalian?“
„Kaloe begitoe, akoe tida bisa bilang apa-apa lagi“, kata Ko Tjeng: „tjoema belon taoe bagimana Twako poenja pikiran ?“
„Akoe satoedjoe boeat pergi," saoet Lie Tjlioen.
Kaloe dibandingken pergi ka kota Radja, sama pergi ka kota Siangtjioe, ada lebi berbahaja dateng ka tempat jahg baroesan akoe seboet doeloean."
„Ja, memang," saoet Tong Beng.
Lie Tjhoen berkata lebi djaoe:
„Doeloe waktoe kita orang masi di Liangsani, Kong-beng Koko soeda pergi nonton ka kota Radja, dimana Lie Kwie telah terbitken kaonaran besar. Tapi toch, achirnja tida koerang soeatoe apa.
„Djoega waktoe Nio Tiong-sih adaken karamean di kota Pakkeng, toch sekalian Hohan soeda bisa menoeloeng Louw Hoangwe, dengen loepoetken diri sendiri dari bahaja jang mengantjem. Sedeng tatkala itoe, bahaja jang dihadepken ada besar sekali.
„Dan tjobałali Tjiongliatwie Hengte pikir, manatah lebi berbahaja kaloe dibandingken perkara jang doeloe, sama jang sekarang kita pergi ka Siangtjioe, jang djoega tida sabrapa djaoe?"
„Akoe moefakat dengen Twako poenja bitjara," kata Tong Wie: „kaloe kita tida pergi, sadikitnja orang nanti katawaken dan bilang kita pengetjoet, boekan?"
Semoea orang, achirnja pada moefakat, hingga Ko Tjeng, jang masi tida satoedjoe, toch apa boleh-boeat, djadi menoeroet djoega, kerna begitoelah maoenja ia poenja laen-laen soedara.
Brapa hari telah berlaloe lagi.
Achir-achir datenglan itoe hari dimana pesta aken dimoelai.
Lie Tjhoen laloe adjak bebrapa orangnja jang boleh dipertjaja dan ada mempoenjai kabranian. Dengen membawa barang-barang bekelan marika laloe toeroen di praoe, jang kamoedian didjalanken dengen ladjoe menoedjoe ka Siangtjioe.
Dari Siauwhewan marika berangkat di waktoe pagi, pada waktoe lohor iaorang telah sampe di Siangtjioe poenja bagian pintoe sebla Koelen.
Sampe di sini, pada sasoedanja dahar dan toekar pakean, Lie Tjhoen bersama soedara-soedaranja laloe naek ka darat.
Tapi sabelonnja berangkat, Tong Wie menjataken pikirannja begini.
Sekarang biarlah itoe lima soedara sadja jang naek doeloean, sedeng ia berdoea Tong Beng tinggal mendjaga praoe. Kamoedian sabentar sore, marika berdoea nanti naek boeat liat dan amat-amati sasoeatoe geraken, dan seandenja ada perkara jang tida baek, sabagimana doegahannja Ko Tjeng, ia berdoea bisa dateng menoeloeng.
„Belon taoe bagimana Twako poenja pikiran?" tanja ia kamoedian. „Litolah pikiran jang bener,” saoet Lie Tjhoen: „tapi dengen begitoe, Hiante berdoea djadi koerang plesir toch?”
„Oh, itoelah perkara ketjil,” saoet Tong Beng.
„Djoega kita poenja dateng toch boekan tjoema meloeloe boeat plesir dan tjari kesenangan hati," menjamboeng Tong Wie „hanja soepaja djangan sampe orang kata kita pengetjoet.”
„Nah kaloe begitoe, baeklah,” kata itoe soedara-soedara.
Sigra djoega itoe lima soedara soeda berdjalan dan sasampenja di pintoe kota, djaoe-djaoe iaorang liat, banjak sekali pendoedoek dari tempat-tempat jang berdeketan dengen Siangtjioe, semoea pada dateng menonton.
Marika iteo kaliatan bergirang. Lelaki dan prampoean, toea dan moeda, semoea bertjampoeran djadi satoe dan masoek ka dalem kota dengen maen doeloe-doeloean. Lie Tjhoen bersama ampat soedaranja, laloe bertjampoeran pada itoe orang-orang dan masoek ka dalem kota dengen tida ada jang kenalin.
Pemandangan di dalem kota ada terlaloe bagoes dan menggirangken. Roepa-roepa teng ada tergantoeng di masing-masing poenja depan pintoe. Sedeng tetaboean poen ada terdenger rioeh sekali.
Meliat karamean itoe, Lie Tjhoen, dengen satoeroe soedaranja djadi goembira sekali. Boekan sadja di sasoeatoe roema orang mampoe hanja roemanja pendoedoek jang saderhana poen, ada kaliatan digantoengin teng jang bagoes-bagoes.
Roema-roema makan dan waroeng-waroeng thee dapet banjak tetamoe. Tapi sebab itoe lima Hohan, pada waktoe maoe naek, soeda bersantap lebi doeloe di praoenja, maka iaorang belon kapingin dahar lagi, hanja berdjalan teroes.
Boelan telah pentjarken sinarnja jang gilang-goemilang.
Itoe waktoe Lie Tjhoen denger orang mengomong jang di ranggon Tjiauwlo ada membri pemandangan jang betoel-betoel sanget mengagoemken bagi orang jang liat.
Mendenger itoe perkatahan, Lie Tjhoen laloe berpaling pada soedara-soedaranja dan kata, apa tida baek kaloe dari sini iaorang teroes pergi ka itoe ranggoon, boeat meliat baglmana kabagoesannja.
,,Ja, hajoelah," saoet jang laen-laen. Sigra djoega iaorang telah sampe di itoe tempat dan betoel sadja pemandangan di itoe ranggoon Tjiauwlo ada sanget mengagoemken.
Lie Tjhoen dapet liat, di tingkatan jang paling atas ada doedoek Lu Thaysioe bersama bebrapa penggawe negri jang lagi makan minoem. Sedeng tingkatan jang sebla bawah, ada djadi tempatnja toekang-toekang menari dan tetaboean. Penerangan dipasang sapoeternja ranggoon itoe, hingga terangnja djadi ampir seperti siang hari.
Lama djoega iaorang berdiam di sini kamoedian, lantas lantaran soeda bosen, Lie Tjhoen laloe adjak itoe ampat soedara berdjalan poela jang ini kali ambil djalanan ka djoeroesan Wetan, dimana banjak djoega orang-orang jang menonton karamean.
Tapi sebab di sini tida ada begitoe banjak tontonan jang boeat diliat, Lie Tjhoen dan sadereknja laloe masoek ka satoe waroeng arak dan minta disadiaken barang-barang makanan.
Marika itoe laloe minoem dengen senang hati sembari liat djoega orang-orang jang masoek dan kaloear.
„Sekarang soeda moelal malem," kata Lie Hoen dan Kotjeng dengen soeara pelahan: „maka baeklah kita kaloear sadja boeroe-boeroe, pada sabelonnja pintoe kota ditoetoep."
„Tapi perloe apa boeroe-boeroe ?" kata Tek
Pembalesan Kawanan Liangsan.
35
Seng, jang merasa tida satoedjoe dengen pendapetannja itoe soedara: „moestail amat pintoe kota lantas ditoetoep, sedeng karamean masi ada?"
„Kaloe begitoe, apa tida baek kaloe akoe berdoea djalan doeloean dan toenggoe di samping pintoe kota?" kata poela itoe doea soedara.
Meliat jang katiga soedara itoe berdiam sadja, Ko Tjeng dan Lie Hoen laloe bertindak dengen tida menanja lagi. Sedeng Lie Tjhoen poen tida menjega, hanja biarken sadja marika itoe djalan dueloean.
Baroe sadja doea soedara itoe berlaloe, dalem itoe waroeng arak ada masoek doea orang jang berpakean idjo dan mendeketi padanja, Orang itoe mengawasi pada Lie Tjhoen dengen doea soedaranja begitoe roepa, tapi kamoedian ia berlaloe lagi sambil berkata dengen soeara pelahan :
„Kirain Kwe Sianseng jang minoem arak, tapi kiranja semoea boekan. Sataoe ka mana itoe tiga orang."
Liwat sasaāt orang jang berkata-kata itoe lantas lintjap dari pemandangan, sedeng Lie Tjhoen bertiga tida sekali memperhartiken apa-apa.
ltoe waktoe Lie Tjhoen hendak adjak Hoei Po bangoen sadja, tapi Tek Seng kaliatan mengawasi ka loear, seperti ada apa-apa jang lagi dipandang.
Kadoea soedara itoe menengok, dan dapet liat dari itoe djoeroesan ada mendatengi satoe orang toea jang membawa tehian, dengen di-ikoetin oleh satoe prampoean moeda jang berparas tjantik.
Njatalah marika itoe ada orang prampoean.
Lie Tjhoen oeroengken niatnja, bersama Hoei Po ia djoega memandang pada itoe nona moeda jang dateng mendeketi sambil berkata:
„Banhok!"
Lie Tjhoen bertiga tida berkata apa-apa, sedeng itoe orang toea, dengen tida diprenta, lantas kaloearken ia poenja tamboer ketjil dan poekoel itoe, jang lantas berboenji dan si nona moeda poen, lantas kaloearken siangsoenja, jang lantes diakoerin.
Kamoedian doea tetaboean itoe berboenji dengen enak.
Sambil boenjiken siangsoe, nona itoe kasi denger djoega njanjian-njanjian jang merdoe, hingga itoe tiga orang gaga, jang tadi maoe bangoen, djadi berdoedoek teroes sambil memandang dengen senang. Apapoela si tjantik itoe ada berbaoe haroem, hingga orang-orang lelaki jang soeka plesir, tentoe tida merasa bosen boeat deket-deketin.
Itoe pertoendjoekan jang mengamen lantes brenti, pada sasoedanja kasi oendjoek permaenannja sedikit waktoe, kamoedian nona itoe membri hormat pada itoe tiga orang gaga, sabagi tanda jang permaenannja telah tjoekoep.
Huei Po lantas kaloearken sedikit oewang perak boeat presen itoe nona eilok, jang ditrima sambil bersenjoem, kamoedian mendjoera dengen hormat dan lantes oendoerken diri.
Ampir berbareng di itoe waktoe djoega, di bagian sebla loear dari itoe waroeng arak ada kadengeran soeara riboet-riboet, hingga membikin sasoeatoe orang jang ada di sitoe djadi menengok, boeat dapet taoe apa adanja.
Bebrapa tetamoe jang lagi minoem, djoega merasa kaget, kerna itoe waktoe kaliatan sarombongan oppas politie, jang terdiri dari kiar-kira limapoeloe orang, dateng menghamperi ka itoe roewangan.
Koenjoeng-koenjoeng Lie Tjhoen berdoea soedaranja seperti orang tersedar, bahoewa orang- politie ini, pastilah hendak menangkep padanja, berhoeboeng dengen itoe perkara pada Teng Tjoe-pian, apapoela itoe waktoe kaliatan Lu Thaysioe ada di antara itoe oppas-oppas jang bergegaman lengkap.
Lie Tjhoen bertiga lantas lompat, hingga medja jang masi penoe gelas-gelas dan piring mangkok, djadi tebalik.
Itoe waktoe, si nona eilok jang tadi mempertoendjoeken permaenannja masi berada di sitoe dan kena terdorong dengen badannja itoe orang gaga hingga ia terlempar ka satoe podjok sambil mendjerit.
Itoe limapoeloe oppas satelah meliat pertandahan jang dibriken oleh doea orang jang berpake badjoe idjo, lantas memboeroe pada itoe tiga orang gaga, dan sebab Lie Tjhoen dengen kadoea soedaran a tida bersadia lebi doeloe, djoega tida bergegaman, apapoela itoe waktoe marika soeda merasa poesing, dengen gampang lantas dapet ditangkep.
Itoe orang jang memake badjoe idjo, boekan laen dari itoe doea orang djoega, jang tadi dateng paling doeloe hamperi ini katiga Hohan, jang sabenernja ada itoe pengawal-pengawal telaga, jang doeloe pernah dilabrak oleh Hoei Po, maka orang jang bisa kenalin ini oleh Thaysioe didjadiken pengintip.
Sigra djoega itoe tiga orang gaga jang soeda teriket dibawa ka kantoornja Lu Thaysioe, jang satelah sampe, Lu Tji-kioe laloe doedoek mamereksa.
Lie Tjhoen bertiga tinggal berdiri, sambil mengawasi pada itoe pembesar jang tjoba bikin laganja sedikit keren.
„He, orang-orang tangkepan, mengapatah kaoe tida berloetoet?" menanja Thaysioe pada katiga tawananja itoe, „Lebi doeloe, haroes diterangken apa sebabnja kita bertiga ditangkep," saoet Lie Tjoen dengen sabar: „apatah kita-orang poenja kasalahan, maka dengen zonder ada sebab jang pantas, kita bertiga moesti diperlakoeken begini ?"
„Truesa kaoe poera-poera tida tane kadosahanmoe, orang-orang doerakah, jang tjoema membawa sadia kabranian sendiri!" menjentak itoe pembesar dengen melotot: boekantah kaoe bertiga ada itoe orang dari kawanan Liangsan?"
„Djadi lantaran itoe, jang membikin kita bertiga ditangkep?" tanja Lie Tjhoen jang masi tinggal bersabar: „dan seande bener begitoe, apatah kasalanannja kawanan Liangsan jang sekarang, maka moesti ditawan?"
„Oh, kaoe maoe taoe kasalahanmoe?" kata Lu Tji-kioe sambil manggoet-manggoet: „oleh pamerenta agoen soeda dikaloearken prenta boeat tangkep semoea kawanan Liangsan jang sekarang ada mengoembara di koeliling tempat, tida perdoeli apa marika itoe ada bersala atawa tida, sebab perkara-perkara di Tjetjioe, soeda tjoekoep terang kasalahannja itoe kawanan doerhaka"
„Tapi, seande bener itoe ada diterbitken oleh kawanan Liangsan, toch kita-orang tida ada toeroet tjampoer satoe apa ?"
„Baek! taro bener begitoe. Tapi kaoe berame soeda oendjoek djoega perboeatan tida patoet di telaga Thayouw, pada bebrapa hari jang laloe, dengen sengadja kaoe hendak langgar hak-haknja Teng Tjoe-pian, apa ini kaoe maoe moengkir ?"
Kaloe bener tjoema lantaran itoe kita-orang ditangkep, inilah soenggoe terlaloe tida adil. Sebab itoe telaga Thayouw toch ada satoe tempat jang mendjadi poesat dari pengidoepannja anak negri, jang Teng Tjoe-pian hendak kangkangin sendiri, dengen menggoenaken pengaroenja boeat tarik itoe kan isilan besar jang menjoesaken bagi orang banjak. Sebenernja itoe perboeatan tida patoet kaoe moesti basmi, atawa sedikitnja membri tegoran, kerna sabagi satoe pembesar dari iboe kota Siang jioe, kaloe kaoe membri perlindoengan. Tapi kaoe tida berboeat demikian, hanja bantoe toendjang maksoednja itoe Pasantjoa, bantoe kasi penggaroe dan laen-laen, jang orang djadi soesa dan bersakit hati. Betoel-betoel kaoe ini ada satoe pembesar kedjem, jang tida mengenal kawadjiban sendiri sampe di wates mana!"
„Hm! kaoe brani toedoe akoe tida mengenal kawadjiban, sedeng kaoe ada mendjadi akoe poenja orang tawanan."
„Memang akoe toedoeh kaoe bersakongkol pada itoe orang djahat, jang tjoema pikiri sadja kaoentoengan boeat diri sendiri, tapi tida inget kasoesahannja orang banjak. Dan kaloe akoe soeda berboeat begitoe, itoelah sakedar boeat menhiboeri sedikit hatinja orang-orang jang telah dibikin sakit. Sekarang akoe bertiga soeda kaoe tawan dengen atoeran jang amat boesoek dan zonder berales dengen kasalahan, lekaslah kasi poetoesan!"
„Sabenernja ini penangkepan jang akoe lakoeken, sekali-kali tida ada herhoeboeng sama itoe perkara di telaga Thayouw, dan djoega tida ada kasangkoet sama perkaranja Teng Tjoe-pian," kata Lu Tji-kioe, jang sengadja kata begitoe, kerna salaennja tida mampoe membri penjabetan jang pantes atas perboeatannja itoe Pahsantjoe, djooga ia tida maoe sampe orang katain ada membantoe kalakoeannja itoe orang hartawan jang mendjadi ia poenja sobat. Dan lantaran ini djoega, maka sabegitoe lama, ia masi maoe denger parkatahan-perkatahannja itoe orang tawanan, soepaja oleh pendoedoek negri jang taoe itoe penangkepan, dikata mendjalanken kawadjiban.
Lebi djaoe ia berkata poela:
„Lagi sekali akoe oelangken, bahoewa dirimoe bertiga ditangkep, sekali-kali tida ada berhoeboeng sama itoe perkara-perkara jang kaoe seboet, hanja sabagimana akoe bilang, sebab pamerenta agoeng memang telah kaloearken prenta boeat tangkep semoea kawanan Liangsan jang mengoembara di koeliling tempat, berhoeboeng dengen itoe perkara di kota Tengtjioe dan paling blakang pertemporan di lemmatjwan. Sebab kaoe dan wan-kawanmoe, oleh pamerenta dianggap sanget berbahaja."
Sahabisnja oetjapken itoe perkatahan jang paling blakang, Lu Thaysioe laloe prenta oppasnja bawa itoe tiga persakitan ka dalem pendjara.
„Hm, bener-bener doegahannja Ko Tjeng tida sala, jang ini pesta sakedar boeat pikat kita dateng ka mari," pikir Lie Tjhoen dalem hati, waktoe iaorang soeda berada dalem pendjara: „tapi baek djoega Tong Beng dan Tong Wie, bersama Lie Hoen dan Tek Seng ada di loear tida toeroet ditangkep, hingga ini perkara troesa terlaloe koeatir.”
„Sekarang, bagimanatah kita moesti berboeat, Twako?” tanja Hoei Po sambil memandang itoe soedara toea.
„Ah, troesa terlaloe boeat pikiran, Hiante,” saoetnja: „sebab kita poenja ampat soedara toch ada di loear, jang sigra djoega tentoe aken dapet taoe, atas kita poenja perkara dan tentoe lantas berichtiar.”
Kadoea soedara itoe tida menjaoet lagi, hanja tinggal diam sadja.
Sekarang baeklah kita tinggalken doeloe ini tiga orang gaga jang berada dalem pendjara, dan mari kita soesoel djalannja Lie Hoen dan Ko Tjeng.