278
3000 soldadoe sadja, boeat mendjalanin itoe barisan, kendati Lioe Si Djoen ada 3 kepala dan 6 tangan atau beriboe soldadoe dan koeda akan poekoel saija poenja barisan itoe, tentoe kedjadiannja seperti orang menjera-in tangannja akan teriket adanja.
Song Boen Djaij amat girang hatinja lantas bri parinta 3000 soldadoe menoeroet Hwi Sik To Djin poenja parintah akan bikin barisan „Tian Lo Tien“. Sasoedahnja teratoer semoea, maka Hwi Sik To Djin panggil hoeloebalang bernama Loei Tian Pit akan pergi menantangin moesoe, perloenja akan soepaija moesoe kena djoesta masoek dalem kita poenja barisan dan nanti di sitoe kita bikin begimana baiknja.
Loei Tian Pit bilang baik lantas sadja pakee pakean perang dan naek koeda, dengan bebrapa pengiringnja soldadoe jang gagah perkasa troes pergi di tempat soldadoenja Djaij Koen Liang dan membilang adjak perang.
Tersamboet oleh Djaij Koen Liang berperangan tida 8 gebrakan, itoe Loei Tian Pit lantas melaga kalah dan troes lari, terkedjarlah oleh Djaij Koen Liang, itoe Loei Tian Pit kombali dan berperang satoe doea gebrakan tetapi dia lantas troes lari,
