255
Lioe Si Djoen tjeritain djoega jang dia soedah dapet tjilaka pireu (bisoe) tetapi oentoeng besar dapet pertoeloengan dari Hwat Go Sian Soe.
Dengan sabentaran sediain makan, Lioe Thaij Thaij bersama Djaij Koen Liang dan Lioe Si Djoen pada bersoeka-soeka hati akan minoem arak, kemoedian pada besok harinja Lioe Thaij Thaij soeroe Lioe Si Djoen pergi komisi sekalian roema pengadeannja, maka Lioe Si Djoen bersama boedjang Lioe Hin berangkat ka roema pengadean itoe, sa- soedahnja terpriksa semoea dan kedapetan baik adanja, Lioe Si Djoen lantas hendak poelang di roemanja dan berdjalan di waroengnja So Po, dapet liat orang berkeroemoen dan pada bilang hendak tangkep Jauw Tji (Siloeman).
Lioe Si Djoen lantas dateng di sitoe dan menanja di mana itoe Siloeman?
Orang-orang itoe menjaoet itoe Siloeman ada di dalem ini waroeng bahmi.
Lioe Si Djoen lantas masoek dalem itoe waroeng, sekoenjong-koenjong datenglah angin menijoep sampe dia poenja dingin rasanja troes di dalem toelang dan Lioe Si Djoen dapet liat njata-njata ada 1 orang reijap-reijap ramboetnja, moeka merah toea dan djengotnja merah amat menakoetin orang.
